Stjórn Launasjóðs listamanna hefur sent frá sér tilkynningu þar sem ástæða er talin til að árétta að rafrænar umsóknir séu ekki lögformlega marktækar „fyrr en þær hafi verið sendar til sjóðsins með fullnægjandi hætti.“
Tilefnið er sagt vera umræðan í kjölfar úthlutunar sjóðsins fyrir helgi, en þar undruðust margir að Einar Kárason rithöfundur, skyldi ekki vera meðal þeirra sem fengu listamannalaun.
Sjálfur sagði Einar frá því á Facebook að hann hefði fyllt út umsókn þann 24. september, eftir að Einar fékk póst frá formanni nefndarinnar um að engin umsókn hefði borist frá honum og að Einar væri „maður að meiri“ ef hann greindi frá því.
Stjórn Launasjóðs listamanna sér í kjölfarið ástæðu til að minna á reglur sjóðsins varðandi umsóknir:
Vegna umræðu sem fram hefur farið í kjölfar úthlutunar úr Launasjóði listamanna vill stjórn sjóðsins taka fram að rafrænar umsóknir eru ekki taldar lögformlega marktækar fyrr en þær hafa verið sendar til sjóðsins með fullnægjandi hætti. Umsækjendur fá sjálfkrafa afrit af umsókn sinni eftir að hún hefur verið send inn og bera ábyrgð á því að umsókn hafi skilað sér. Aðeins fullkláraðar og innsendar umsóknir eru teknar til meðferðar hjá úthlutunarnefndum.
Umsóknarkerfi listamannalauna er að þessu leyti sambærilegt öðrum sjóðum tengdum vísindum og listum í umsjá Rannís. Um meðferð umsókna segir í 6. gr. reglugerðar um listamannalaun: „Við veitingu starfslauna og styrkja úr öllum sjóðum skulu úthlutunarnefndir gæta þess vandlega að allar umsóknir fái sanngjarna umfjöllun og ákvarðanir séu ávallt reistar á faglegum sjónarmiðum.“
Stjórn ítrekar fullt traust til úthlutunarnefnda Launasjóðs listamanna.
Bryndís Loftsdóttir
Formaður stjórnar Launasjóðs listamanna