Edward Hákon Huijbens, prófessor við Háskólann á Akureyri, sem kjörinn var varaformaður Vinstri grænna síðla árs 2017, hyggst ekki gefa kost á sér til endurkjörs á landsfundi VG í haust. Þetta segir hann í færslu á Facebook.

Ástæðan er að Edward hyggst flytja búferlum til Hollands starfs síns vegna.

Árið 2017 voru tveir í framboði til embættis varaformanns, þeir Edward og Óli Halldórsson, sveitarstjórnarmaður í Norðurþingi. Alls 223 greiddu atkvæði í varaformannskjörinu og hlaut Edward 148 atkvæði, eða 66,4%, en Óli hlaut 70 atkvæði, 31,4%.

Í samtali við Eyjuna vildi Óli ekki svara því hvort hann hygðist bjóða sig fram að nýju í haust, hann væri ekki búinn að gera upp hug sinn.

„Kæru vinir! Nú er það svo að skjótt skipast veður. Eftir fjögurra mánaða útlegð á hafinu í haust, í ljúfu frelsi internetsleysis, komum við fjölskyldan heim milli jóla og nýárs. Þá hófst næsta verkefni sem er að undirbúa flutning til Hollands. Ég fékk afbragðs tilboð um að leiða rannsóknarhóp á sviði menningarlandfræði við Wageningen háskóla og hef þar störf sem prófessor og stjórnandi þessa 30 manna hóps 1. febrúar. Þetta er mikið akademískt framfaraspor, en auðvitað með trega sem maður fer frá eyjunni ísa. Ég mun starfa sem varaformaður VG fram að landsfundi í haust, enda fjölskyldan ekki að elta mig út fyrr en þá og stutt er milli Amsterdam og Íslands, reyndar stundum næstum eins auðvelt og Akureyri – Reykjavík. Við munum eiga heimili/íbúð áfram á Íslandi, en þurfum eitthvað að endurskipuleggja og því er heimili okkar til 12 ára nú komið á sölu.“