„Guð minn góður. Ég er dáleidd. Hvenær ætli svona tryllitæki verði í stærð og á verði sem réttlætir þessi kaup? Myndi samt fórna hálfri stofunni fyrir þetta. Kveðja kona á fjórðu vél að brjóta saman.“
Svona hljóðar Facebookfærsla Þórdísar Kolbrúnar Reykfjörð Gylfadóttur, ráðherra ferðamála, iðnaðar og nýsköpunar, um myndband sem sýnir sannkallað undratæki brjóta saman þvott.
Ísraelska fyrirtækið Foldimate hefur hannað tæki sem sér um að brjóta saman þvott, sem reynist mörgum hvimleitt húsverk og verður tækið eflaust til á hverju íslensku heimili áður en langt um líður, nokkurskonar fótanuddtæki framtíðarinnar, enda Frónarbúar nýjungagjarnir með eindæmum.
Apparatið er væntanlegt á markað í lok ársins, en áætlað verð á tækinu er um 120 þúsund krónur, eða 980 dollarar. Fyrirtækið frumsýndi tækið í Las Vegas á CES sýningunni, sem er í gangi þessa daganna og er ein stærsta tæknisýning heimsins.
Þórdís Kolbrún, sem er með um 2,2 milljónir á mánuði, ætti vel að geta réttlætt kaupin án samviskubits, finni hún pláss fyrir gripinn, enda verður ekki annað séð en þetta sé hinn þarfasti þjónn.
Sjón er sögu ríkari:
