fbpx
Miðvikudagur 16.janúar 2019
Eyjan

Vigdísarholt mun annast rekstur hjúkrunarheimilisins á Seltjarnarnesi

Ritstjórn Eyjunnar
Fimmtudaginn 10. janúar 2019 17:03

Frá undirritun viljayfirlýsingarinnar í heilbrigðisráðuneytinu í dag

Vigdísarholt ehf. mun annast rekstur nýja hjúkrunarheimilisins á Seltjarnarnesi, samkvæmt viljayfirlýsingu heilbrigðisráðherra og Vigdísarholts ehf. sem undirrituð var í dag. Félagið mun einnig taka að sér rekstur dagdvalarrýma í bæjarfélaginu og er stefnt að umtalsverðri fjölgun þeirra.

Svandís Svavarsdóttir heilbrigðisráðherra segir fagnaðarefni að með þessu hafi verið eytt þeirri óvissu um rekstur heimilisins sem skapaðist þegar ljóst varð að Seltjarnarnesbær myndi ekki axla samningsbundna ábyrgð sína á rekstri þess:

„Ég hef lagt alla áherslu á að tryggja opnun heimilisins um leið og það er tilbúið til reksturs, því hver dagur er dýrmætur í þessum efnum. Tafarlaus opnun þessa hjúkrunarheimilis er eitt af því sem sérstaklega er nefnt í hlutaúttekt Embættis landlæknis til að bregðast við alvarlegri stöðu á bráðamóttöku Landspítalans.“

Fyrir liggur að Seltjarnarnesbær mun afhenda hjúkrunarheimilið fullfrágengið og fullinnréttað til rekstrar, líkt og kveðið er á um í samningi, fyrir næstu mánaðamót. Samkvæmt viljayfirlýsingunni tryggir heilbrigðisráðuneytið greiðslur fyrir rekstri 40 hjúkrunarrýma af hálfu Sjúkratrygginga Íslands frá 1. febrúar næstkomandi. Gert er ráð fyrir að það geti tekið allt að þrjá mánuði að koma heimilinu í fullan rekstur þannig að öll hjúkrunarrýmin verði fullnýtt: „Við munum leggja allt kapp á að taka heimilið í notkun eins fljótt og kostur er, manna stöður og ljúka öðrum undirbúningi“ segir Steingrímur Ari Arason, formaður stjórnar Vigdísarholts en hann gerir ráð fyrir að hægt verði að taka við fyrstu heimilismönnunum í byrjun apríl.

Vigdísarholt sem tekur að sér rekstur hjúkrunarheimilisins á Seltjarnarnesi, er einkahlutafélag í eigu ríkisins. Félagið rekur einnig hjúkrunarheimilið Sunnuhlíð í Kópavogi undir stjórn Kristjáns Sigurðssonar sem er framkvæmdastjóri Vigdísarholts og mun einnig stýra rekstri heimilisins á Seltjarnarnesi. Horft er til samlegðaráhrifa í þessu sambandi með góða þjónustu og samnýtingu að leiðarljósi.

Dagdvalarrýmum verði fjölgað að ári úr 9 í 25

Vigdísarholt mun einnig taka að sér rekstur níu dagdvalarrýma sem Seltjarnarnesbær hefur rekið við Skólabraut. Þann 1. júlí næstkomandi verður sú þjónusta færð inn í húsnæði nýja hjúkrunarheimilisins. Stefnt er að því að fjölga dagdvalarrýmunum verulega, eða úr níu í 25 frá 1. janúar 2020, líkt og fram kemur í viljayfirlýsingunni sem undirrituð var í dag.

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Ekki missa af

Eyjan
Fyrir 10 klukkutímum

Vilja hraða undirbúningi að lagningu sæstrengs

Vilja hraða undirbúningi að lagningu sæstrengs
Eyjan
Fyrir 11 klukkutímum

Segir lífeyrissjóðakerfið of dýrt – Skoðar lækkun iðgjalda gegn hærri launum

Segir lífeyrissjóðakerfið of dýrt – Skoðar lækkun iðgjalda gegn hærri launum
Eyjan
Í gær

Dagur hellti sér yfir Vigdísi – Sjáðu myndbandið

Dagur hellti sér yfir Vigdísi – Sjáðu myndbandið
Eyjan
Í gær

Samdráttur í kortaveltu: „Landsmenn stilltu jólagleðinni í hóf“

Samdráttur í kortaveltu: „Landsmenn stilltu jólagleðinni í hóf“
Fyrir 2 dögum

Er braggamálið frávik ?

Er braggamálið frávik ?
Eyjan
Fyrir 2 dögum

Hvar er best að búa á Íslandi? – Reykjavík í 21. sæti

Hvar er best að búa á Íslandi? – Reykjavík í 21. sæti