Samtals keyptu hlutafélög í Kauphöll Íslands til baka eigin bréf fyrir 14,3 milljarða króna á síðasta ári, samkvæmt ViðskiptaMogganum. Arðgreiðslur námu 15,6 milljörðum, sem er aukning frá árinu áður, en þá námu arðgreiðslur 14,9 milljörðum króna.
Auk þess greiddi VÍS tryggingarfélagið út 1,8 milljarða til hluthafa í formi hlutabréfa í kviku banka og námu því arðgreiðslur ársins 2018 alls 17,4 milljörðum, en heildarmarkaðsvirði skráðra félaga var 960 milljarðar í lok síðasta árs.
Vilhjálmur Birgisson, formaður Verkalýðsfélags Akraness, er kaldhæðinn í umfjöllun sinni um málið, er hann setur arðgreiðslurnar í samhengi við kröfugerð verkalýðshreyfingarinnar:
„Mikið er það nú „ánægjulegt“ að sjá að kröfugerð verkafólks hafði ekki neikvæð áhrif á að eigendur skráðra fyrirtækja í Kauphöllinni næðu að greiða sér veglegar arðgreiðslur á síðasta ári. Ég sem var farinn að halda að kröfugerð verkafólks væri nánast búin að skapa „þjóðargjaldþrot“ allra íslenskra fyrirtækja, en jæja gott að hægt sé að greiða nokkra „smáaura“ í arðgreiðslur þrátt fyrir þá „sturluðu og gölnu“ kröfugerð verkalýðshreyfingarinnar um að hægt sé að lifa á lágmarkslaunum!“