Björn Bjarnason hefur bæst í hóp fólks sem gagnrýnir borgarstjóra fyrir setu sína í nefnd um braggamálið, eftir að hann neitaði að verða við áskorun Hildar Björnsdóttur, borgarfulltrúa Sjálfstæðisflokksins, um að víkja úr henni þar sem efast mætti um trúverðugleika hans, sökum ábyrgðar í braggamálinu.

Björn segir á heimasíðu sinni:

„Reiði Dags B. birtist í því að mánudaginn 7. janúar gerði hann lítið úr sjálfstæði Hildar í útvarps- og sjónvarpsfréttum og lýsti henni sem strengjabrúðu harðlínuafla í baklandi sjálfstæðismanna í Reykjavík „sem vilja ekki neitt samstarf milli meirihluta og minnihluta,“ sagði Dagur B. og talaði af karlrembu niður til Hildar.“

Dagur lýsti því yfir í sexfréttum RÚV í gær, að braggamálinu væri lokið:

 „Ja, braggamálinu er lokið, framkvæmdum er lokið, óháðri úttekt er lokið,“

Um þetta segir Björn:

„Þarna birtist enn ein afneitun borgastjóra í þessu máli. Umræðum um málið er ef til vill lokið milli meirihlutaflokkanna í borgarstjórn. VG, Viðreisn og Píratar fylkja sér á bak við Dag B. í þeirri trú að þar með sé þessu máli lokið.“

Þá vekur Björn athygli á ummælum Vigdísar Hauksdóttur frá því í dag, sem sagði að braggamálið væri rétt að byrja.

Sjá einnig: Dagur borgarstjóri sakaður um kvenfyrirlitningu:„Ekki veit ég hvernig Samfylking kemur fram við sínar konur“