„Las Reykjavíkurbréf ritstjóra morgunblaðsins rétt í þessu. Það er augljóst á lestri bréfsins að hann þráir að komast aftur inn í þingið enda eyðir hann næstum öllu pláss sínu í að tala um eldra fólk í stjórnmálum víða um heim.“
Þetta segir Helga Vala Helgadóttir, þingkona Samfylkingarinnar, á Facebook-síðu sinni. Tilefnið er Reykjavíkurbréf Morgunblaðsins um helgina en ætla má af lestri bréfsins að þar haldi Davíð Oddsson, ritstjóri Morgunblaðsins og fyrrverandi forsætisráðherra, á penna.
Í bréfinu skrifar Davíð meðal annars um aldur stjórnmálamanna, bæði hér heima og erlendis. Hann nefnir fjölda fólks, einstaklinga sem komnir eru á áttræðis- og jafnvel níræðisaldur, en lætur til sín taka í stjórnmálum af krafti. Hann byrjar þó á að nefna Ellert B. Schram sem á dögunum varð elstur manna til að setjast á Alþingi Íslendinga, 79 ára gamall.
„Mörgum varð hugsað til þess að óvænta fréttin væri frekar sú að enginn maður á þessum aldri eða eldri skyldi hafa setið á þingi þjóðarinnar,“ segir Davíð sem telur síðan upp fleiri dæmi um einstaklinga sem látið hafa til sín taka á sviði stjórnmála, jafnvel þó þeir séu komnir af léttasta skeiði, ef svo má segja.
„Árið 1964 flykktist múgur og margmenni að þinghúsinu í London þegar fréttist að Winston Churchill væri að hætta á þingi. Hann var þá níræður. Settist inn í bíl sinn reykjandi eðalvindil og gaf sigurmerkið.“
Davíð heldur svo áfram:
„De Gaulle sagði óvænt af sér sem forseti Frakklands 78 ára gamall. Vinur hans, Konráð Adenauer lét af kanslaraembætti Þjóðverja 84 ára gamall.“
Hann nefnir svo Franco, sem var einvaldur á Spáni þar til hann lést 83 ára, og svo annan umdeildan stjórnmálamann. „Berlusconi, sá gamli vinur bréfritara, heldur 82 ára enn um marga spotta á Ítalíu og er þá ekki átt við hlýra og bikinibönd.“
Davíð heldur áfram að telja upp fólk sem verið hefur áberandi á undanförnum árum, ýmist í opinberum embættum eða stjórnmálum. Bendir hann á að enginn njóti eins mikils trausts í Bretlandi og Elísabet drottning sem verður 93 ára í vor. Hann bendir réttilega á að hún þurfi þó ekki að horfa með hrolli til kjörkassanna.
Í Bandaríkjunum nefnir hann Dianne Feinstein, þingmann öldungadeildar frá Kaliforníu, sem verður 86 ára í sumar. Hún verður 92 ára næst þegar hún þarf að huga að endurkjöri. Nancy Pelosi, sem á dögunum var kjörin þingforseti fulltrúadeildarinnar, er á 79. aldursári. Joe Biden, sem er sagður líklegur sem forsetaefni demókrata fyrir næstu forsetakosningar, verður 78 ára á næsta ári. Annar sem nefndur hefur verið er Michael Bloomberg, fyrrverandi borgarstjóri New York, sem er tæpu ári eldri en Biden.
Davíð nefnir svo fleiri til sögunnar en þess má geta að Davíð Oddsson er er fæddur 17. janúar 1948 og verður því 71 árs í næstu viku. Miðað við upptalninguna sem birtist hér að framan gæti vel farið svo að Davíð snúi aftur í pólitík hafi hann á að annað borð áhuga. Aldur virðist að minnsta kosti ekki skipta miklu máli eins og hann bendir sjálfur á í grein sinni.
Helga Vala segir augljóst að Davíð þrái að komast aftur inn í þingið. „Spurning hvort hann endi ekki bara á því að leiða einn lista Miðflokksins í næstu kosningum,“ segir hún. Nokkrir tjá sig undir færslu Helgu Völu. Einn þeirra er Guðjón Friðriksson sagnfræðingur sem segir: „Þetta er de Gaulle heilkennið sem hrjáir marga gamla og löngu hætta stjórnmálamenn. Þá dreymir stöðugt um „come back“.
Sigurjón M. Egilsson, fjölmiðlamaður á Miðjunni, benti einnig á þetta á vef sínum og sagði: „Í Reykjavíkurbréfi morgundagsins rekur Davíð Oddsson aldur áberandi stjórnmálamanna, austan hafs og vestan. Niðurstaðan er sú að Davíð, sem verður 71 árs eftir fáa daga, er ekki svo gamall og gæti því enn átt endurkomu í stjórnmálin, alla vega aldursins vegna.“