Þórunn Sveinbjarnardóttir, formaður BHM, ítrekar þá stefnu samtakanna að fara fram á ríflegar kjarabætur í komandi kjaraviðræðum. Hún segist styðja kröfuna um lágmarkslaun upp á 420.000 krónur sem nokkur stór stéttarfélög hafa lagt fram, en bendir á að sumir félagsmanna sinna séu nú þegar með lágmarkslaun upp á 417 þúsund krónur. Stór hluti félagsmanna í BHM sé með laun á milli 400 og 600 þúsund krónur.

Þetta kom fram í umræðuþættinum Í vikulokin á RÚV. Þórunn bendir á að hennar félag hafi tekið mikinn þátt í því að koma á stöðugleika eftir hrun og félagsmenn tekið á sig kjaraskerðingar. Félagið hafi staðið í verkfallsaðgerðum árið 2015 sem enduðu með lagasetningu og gerðardómi. Almenni markaðurinn hafi síðan notað niðurstöðu þess dóms til að fá hækkanir og ávinningurinn hafi núllast út.

Lágmarkslaun eru nú 300.000 krónur og er ljóst að hækkun þeirra upp í 420.000 krónur er aðeins gerleg ef þær launahækkanir fara ekki upp allan launastigann í prósentuvís. BHM virðist hins vegar ekki ætla að gefa eftir í sinni kröfugerð.