Hannes Hólmsteinn Gissurarson, prófessor í stjórnmálafræði við Háskóla Íslands, er ósáttur við að fréttastofa Stöðvar 2, Vísis og Bylgunnar hafi valið Sólveigu Önnu Jónsdóttur, formann Eflingar, sem mann ársins fyrir „fyrir óvænta, einarða og hvassa verkalýðsbaráttu.“

Val fréttastofunnar var kynnt í Kryddsíldinni á gamlársdag venju samkvæmt, en virðist það hafa farið fyrir brjóstið á Hannesi að sósíalisti hafi hlotið þessa nafnbót, enda lengi haft horn í síðu sósíalista í gegnum árin, þegar kemur að stjórnmálaskoðunum.

Hannes segir á Facebook síðu sinni um val Stöðvar 2:

„Þetta segir meira um fólkið á fréttastofunni en þennan sósíalista, en rösklega 100 milljónir manns týndu lífi af völdum sósíalismans á 20. öld, í Kína, Rússlandi, Kambódíu og víðar. Hvenær yrði yfirlýstur nasisti maður ársins?“

Hannes gagnrýndi einnig þátttöku Jóns Gnarr í Áramótaskaupinu í ár, en Jón var meðal höfunda þess. Sagði Hannes að Jón væri „alkunnur letingi og auðnuleysingi:

„Það er auðvitað með ólíkindum, að Ríkisútvarpið fái Jón Gnarr til að skrifa handrit að spaugi um liðið ár. Hann er hatursmaður Sjálfstæðisflokksins og alkunnur letingi og auðnuleysingi, tók full laun fyrir að gera ekki neitt sem borgarstjóri, en fann vanmetakennd sinni útrás í árásum á sjálfstæðismenn í borgarstjórn. Hann er trúður án erindis,“

skrifaði Hannes.

Sjá nánar: Skiptar skoðanir um Skaupið og þátttöku Jóns Gnarr:„Alkunnur letingi og auðnuleysingi“