Elizabeth Warren, öldungardeildarþingmaður Demókrata í Massachusetts-fylki, tilkynnti á gamlársdag að hún hyggðist bjóða sig fram til embættis forseta Bandaríkjanna árið 2020. Warren er nafntogaðasti Demókratinn sem hefur tilkynnt um framboð sitt en hún hefur lengi verið orðuð við framboð. Í tölvupósti til stuðningsmanna sinn sagði Warren að hún hefði sett á laggirnar , sem gerir henni kleift að safna fé og ráða í lykilstöður áður en formlegt forsetaframboð fer af stað. Þá birti hún fjögurra mínútna myndband þar sem hægt er að lesa í hverjar verða helstu áherslunar hennar í framboðinu. Búist er við að fjölmargir þekktir Demókratar muni tilkynna um framboð sitt á næstu vikum og mánuðum.
Warren og Donald Trump, forseti Bandaríkjanna, hafa lengi eldað grátt silfur saman. Hefur Trump meðal annars ítrekað uppnefnt Warren „Pocahontas“ í ljósi þess að þingkonan hefur haldið því fram að hún eigi ættir sínar að rekja til frumbyggja Bandaríkjanna. Fyrr á árinu birti Warren niðurstöður DNA-prófs til þess að sýna fram á ættartengslin en Trump gaf lítið fyrir þær tilraunir. Það var því beðið með talsverðri eftirvæntingu eftir viðbrögðum Trump við framboði Warren. Forsetinn var þó óvenju hófsamur og óskaði þingkonunni góðs gengis. „Við sjáum hvernig henni gengur, ég óska henni velfarnaðar. Ég vona að hún standi sig vel. Ég myndi njóta þess að vera í framboði gegn henni,“ sagði Trump.