Í dag er alþjóðlegur baráttudagur gegn kjarnavopnum. Samtökin ICAN, handhafar friðarverðlauna Nóbels, hafa tileinkað þennan dag baráttunni fyrir samþykkt alþjóðlegs banns við kjarnorkuvopnum og í yfirlýsingu frá Samstarfshópi friðarhreyfinga er þess krafist að íslensk stjórnvöld gerist aðilar að sáttmálanum, þar sem framtíð mannkyns sé að veði:

„Sjaldan eða aldrei hefur mannkynið farið nær gjöreyðingu en þann 26. september árið 1983. Þann dag gáfu tölvukerfi sovéska hersins til kynna að Bandaríkin hefðu gert árás á landið. Ef ekki hefði komið til ákvörðun hermanns sem ákvað að taka ekki mark á tilkynningunni, sem reyndist vegna tölvubilunar, hefði kjarnorkustyrjöld brotist út.

Enn í dag, öllum þessum árum síðar, eru kjarnavopn stöðug ógn við líf og tilveru jarðarbúa – hvort sem til beitingar þeirra kynni að koma fyrir slysni eða af ásettu ráði. Kjarnorkuveldum hefur fjölgað og geigvænlegum fjárhæðum er varið til þróunar á þessum vopnum,“

segir í tilkynningu.

Þar kemur einnig fram að sextíu ríki hafi undirritað sáttmálann um bann við „þessum skelfilegu vopnum“ og þar af hafi fimmtán ríki fullgilt hann:

„Um leið og fimmtíu lönd hafa lokið fullgildingarferlinu mun sáttmálinn öðlast stöðu sem viðurkenndur sáttmáli Sameinuðu þjóðanna. Gert er ráð fyrir að aðilum samningsins fjölgi hratt á næstunni og þann 26. september verður einmitt sérstök athöfn í höfuðstöðvum Sameinuðu þjóðanna í New York þar sem ríkjum gefst færi á að slást í hópinn

Það er krafa friðar- og afvopnunarsinna að íslensk stjórnvöld láti ekki sitt eftir liggja í baráttunni gegn kjarnorkuvopnum og gerist hið allra fyrsta aðilar að þessum mikilvæga sáttmála. Framtíð mannkyns er að veði.“