Teitur Björn Einarsson, varaþingmaður Sjálfstæðisflokksins í Norðvesturkjördæmi, er fyrsti flutningsmaður frumvarps hvers tilgangur er að ríkið hætti að reka verslanir með tollfrjálsar vörur í gegnum Isavia og Fríhöfnina í Leifsstöð.
Þess í stað verði verslunarrýmið boðið út á almennum smásölumarkaði, sem annist alla verslunarþjónustu, þar með talið rými ÁTVR, sem selur áfengi og tóbak:
„Tilgangurinn er að hlutverk Isavia ohf. verði áfram að meginstefnu til að annast rekstur og uppbyggingu flugstöðvar Leifs Eiríkssonar en öðrum aðilum verði falinn rekstur verslunar og þjónustu í flugstöðinni. Þannig er skilið betur á milli þess sem fellur undir eðlilegt verksvið ríkisins í flugstöðinni og hefðbundinnar verslunar og þjónustu sem best er komin í höndum einkaaðila í virkri samkeppni á smásölumarkaði,“
segir í greinargerð frumvarpsins sem tekur gildi 1. júlí á næsta ári, verði það samþykkt.
Í núgildandi lögum er sérstaklega mælt fyrir um skyldu Isavia ohf. til að hafa með höndum rekstur fríhafnarverslunar, en með með því að bjóða út rekstur á verslunarrýminu væri verið að samræmast ákvæði laga um opinber innkaup, þar sem gætt sé að jafnræði fyrirtækja og stuðlað að virkri samkepnni milli aðila á innlendum smásölumarkaði.
Aðrir flutningsmenn frumvarpsins eru Sjálfstæðismennirnir Áslaug Arna Sigurbjörnsdóttir, Óli Björn Kárason og Vilhjálmur Árnason.