Mynd dagsins er tekin um borð í bandaríska flugmóðurskipinu USS Harry S. Truman, suður af Íslandi í gær.
Þar má sjá Guðlaug Þór Þórðarson, utanríkisráðherra Íslands, ásamt fríðu föruneyti sendiherra Kanada, Þýskalands og Englands, á Íslandi. Með í för eru einnig Þorgerður Katrín Gunnarsdóttir formaður Viðreisnar, Albertína Friðbjörg Elíasdóttir þingmaður Samfylkingarinnar, Smári McCarthy þingmaður Pírata og Njáll Trausti Friðbertsson þingmaður Sjálfstæðisflokksins auk starfsfólks varnarmálaskrifstofu utanríkisráðuneytisins.
Tilgangurinn var að fylgjast með æfingum og hitta yfirmenn, samkvæmt frétt DVIDS.
„Það var heiður að að hýsa sendinefndina frá Íslandi. Við metum mikils það tækifæri að fá að hitta leiðtoga frá gömlum og traustum bandamönnum NATO og fá færi til að sýna fjölhæfni stríðsmáttar þess sem býr í árásarskipi þessu til verndar sameiginlegra hagsmuna okkar. Í yfir 70 ár hafa Bandaríkin og bandamenn okkar í Evrópu stuðlað að frelsi, friði og velsæld í heiminum. Staðsetning USS Harry S. Truman tryggir evrópskar siglingarleiðir sem stuðla að alþjóðlegum viðskiptum og hagsæld.“
sagði Gene Black, yfirmaður um borð, við þetta tækifæri.
Guðlaugur Þór sagði að Ísland hefði „sterkt samband og skuldbindingu við bandamenn okkar,“ sem stofnmeðlimir NATO:
„Við erum herlaust aðildarríki NATO, en við tökum þátt í hefðbundinni varnarstarfsemi, þannig að þetta var frábært tækifæri. Það er engin spurning, að sagan hefur sýnt fram á mikilvægi NATO og sagan mun sýna að NATO er jafn mikilvægt nú og það verður í framtíðinni.“
sagði Guðlaugur Þór.
Samkvæmt frétt Vísis er um boðsferð að ræða af hálfu bandarískra stjórnvalda.
Með í för eru Þorgerður Katrín Gunnarsdóttir formaður Viðreisnar, Albertína Friðbjörg Elíasdóttir þingmaður Samfylkingarinnar, Smári McCarthy þingmaður Pírata og Njáll Trausti Friðbertsson þingmaður Sjálfstæðisflokksins auk starfsfólks varnarmálaskrifstofu utanríkisráðuneytisins.
Logi Már Einarsson, formaður Samfylkingarinnar, Rósa Björk Brynjólfsdóttir, þingmaður VG og Gunnar Bragi Sveinsson, þingmaður Miðflokksins, afþökkuðu boðsferðina.
Í kvöldfréttum Stöðvar 2 sagði Dagur B. Eggertsson að hann myndi kanna málið, en íslenski hópurinn var ferjaður um borð í flugmóðurskipið í tveimur herflugvélum frá Reykjavíkurflugvelli, en samkvæmt samningi ríkis og Reykjavíkurborgar frá 2013 er tekið fram að Reykjavíkurflugvöllur skuli ekki notaður undir hernaðarstarfssemi, nema í undantekningartilfellum, til dæmis í björgunaraðgerðum.
Dagur segir enga tilkynningu hafa borist borginni vegna málsins, en tók fram að það væri ekki víst að það væri nauðsynlegt.
