Vilhjálmur Birgisson, formaður Verkalýðsfélags Akraness, fagnar áformum velferðarráðuneytisins um að ráðast í víðtækt samstarf gegn félagslegum undirboðum á vinnumarkaði. Hann segir slík undirboð vera kjarasamningsbrot og algeng innan ferðaþjónustunnar:
„Ég fagna þessu, enda ólíðandi og óþolandi að hér séu fyrirtæki sem stundi launaþjófnað eins og enginn sé morgundagurinn. Það er samrómaálit okkar í verkalýðshreyfingunni að félagsleg undirboð og kjarasamningsbrot eru því miður algengust í ferðaþjónustunni.“
Hann segir þetta einnig viðgangast í byggingariðnaðinum:
„Það er þó rétt að geta þess að gróf kjarasamningsbrot eru ekki einskorðuð við ferðaþjónusta og nægir að nefna í því samhengi t.d. byggingariðnaðinn. Sem betur fer er meirihluti fyrirtækja sem vilja hafa hlutina í lagi og koma fram við sína starfsmenn af virðingu en því miður er því alls ekki til að dreifa með öll fyrirtæki á íslenskum vinnumarkaði.“
„Ég vil að Alþingi lögfesti samhliða kjarasamningum um áramótin að félagsleg undirboð og launaþjónaður verði gerður refsiverður og fyrirtæki sem verða uppvís að slíku verði sektað með háum sektargreiðslum. Einnig þarf að lögfesta að verkalýðshreyfingin hafi víðtækar heimildir til gagnaöflunar t.d. kalla eftir tímaskýrslum, launaseðlum og öðrum gögnum sem þarf til að upplýsa hvort um félagsleg undirboð sé verið að ástunda hjá fyrirtækjum.“