Meirihluti landsmanna vill setja strangari reglur um notkun á flugeldum og fjórðungur vill banna almenna notkun með öllu. Þetta sýnir ný rannsókn sem vísindamenn við Háskóla Íslands hafa unnið að síðustu misseri og snýr bæði að viðhorfi til flugeldanotkunar og mengunar af völdum flugelda á höfuðborgarsvæðinu, samkvæmt tilkynningu.
Að rannsókninni standa Hrund Ólöf Andradóttir, prófessor við Umhverfis- og byggingarverkfræðideild Háskóla Íslands, og Þröstur Þorsteinsson, prófessor í umhverfis- og auðlindafræði við sama skóla. Í rannsókninni var svifryksmengun á höfuðborgarsvæðinu síðastliðin sl. tólf áramót skoðuð í alþjóðlegu samhengi ásamt áhrifaþáttum mengunar en jafnframt kannaðar leiðir til úrbóta. Auk þess var viðhorf hagsmunaðila innan stjórnkerfisins, meðal sveitarfélaga, seljenda flugelda og ferðaþjónustu til flugelda kannað og sömuleiðis viðhorf þjóðarinnar í skoðanakönnun sem unnin var í samstarfi við Félagsvísindastofnun Háskóla Íslands.
Niðurstöður rannsóknarinnar sýna m.a. að dægurgildi svifryks, sem er minna en tíu míkrómetrar í þvermál (PM10), hafa ítrekað farið yfir heilsuverndarmörk á höfuðborgarsvæðinu á nýársdag sl. 12 ár. Sérstakt áhyggjuefni er gríðarhár styrkur svifryks á griðastöðum í þéttbýli, í miðjum íbúðarhverfum og útivistarsvæðum. Hæsta klukkustundargildi fíns svifryks, sem telst minna en 2,5 míkrómetrar í þvermál, um síðustu áramót mældist t.d. 3000 µg/m3 í Dalsmára í Kópavogi. Þetta er er talið vera Evrópumet í mengun. Þetta fína svifryk getur ferðast djúpt ofan í lungun, niður í lungnablöðrur og þaðan í blóðrásarkerfið og skaðað líffæri. Í ofanálag inniheldur flugeldasvifryk hækkað magn þungmálma sem flokkast sem eiturefni. Einnig mældist hækkað gildi af Benzo(a)pyren í svifrykinu sl. áramót en það er krabbameinsvaldandi.
Nánar verður farið yfir niðurstöður rannsóknarinnar og mögulegar leiðir til úrbóta á opnum fundi með rannsakendum í Háskóla Íslands föstudaginn 21. september kl. 14-15 í stofu 132 í Öskju, Sturlugötu 7.