Björn Leví Gunnarsson, þingmaður Pírata, segir á Facebook-síðu sinni að þegar hann vann hjá fjölmiðlafyrirtækinu 365 hafi yfirmaður hans þrýst á sig að eyða bloggfærslu sem hann skrifaði í frístundum. Færslan sýndi fram á að tónlist.is geymdi ódulkóðaðar upplýsingar og hættan við slíkt væri margvísleg.
„Ég vann í örstuttan tíma í forritun hjá 365. Á þeim tíma skrifaði ég bloggpistil um ódulkóðuð lykilorð eftir ábendingu sem ég fékk. Þetta vakti smá athygli, nægilega mikla til þess að yfirmaður minn var fenginn til þess að biðja mig um að eyða bloggfærslunni. Á þeim tíma var hvergi hægt að sjá að 365 væri eigandi tonlist.is og ég hef ekki hugmynd um hver á vefinn núna,“
skrifar Björn.
Björn segist ekki hafa unnið lengi á 365 eftir þetta:
„Allavega, ég sagðist bara vera að skrifa bloggfærslu í mínum frítíma. Ekkert sem kæmi fram í færslunni væri eitthvað sem ég hefði vegna upplýsinga sem ég hefði aðgang að vegna starfsins míns. Það skipti ekki máli. Það var ágætis reynsla að prófa að vinna þarna. Ég ákvað hins vegar að klára ekki fyrsta 3 mánaða tímabilið … af augljósum ástæðum.“