Hún var skrítin stemmingin í Miðbænum nú um miðjan daginn þegar Alþingi var sett. Miklar girðingar höfðu verið settar upp kringum þinghúsið, það var sama og enginn að horfa og varla neinn að mótmæla heldur. Kannski eitt skilti eða svo.
En það bókstaflega úði og grúði af lögreglumönnum. Ég kom frekar seint og sá þegar var verið að aka hersingunni burt í sendiferðabílum. En fólk sem ég hitti talaði um að það hefði aldrei séð annað eins. Kannski hafa þeir verið jafn fjölmennir áður, en þarna var enginn mannfjöldi til að hverfa í.
Sumir litu reyndar frekar út eins og hermenn en lögregluþjónar.
Það er fínt að hafa góða löggæslu, en einhvern veginn virkaði þetta hálf neyðarlega. Lögreglumennirnir of áberandi – við athöfn sem er væntanlega ætlað að vera hátíðleg.
Guðni Th. Jóhannesson forseti flutti góða ræðu við þingsetninguna, eins og hans er von og vísa. Eftirfarandi orð hans eru tímabær.
Um leið vitum við hins vegar af ærnum vanda, kvíða og vanlíðan meðal of margra, ungra sem aldinna, álagi og kulnun í starfi, misnotkun lyfja og vímuefna, stundum með hörmulegum afleiðingum. Vaxandi kostnaði við að hlúa að sjúkum, fötluðum og öldruðum, auk allra annarra sem þurfa aðhlynningar við. Hvað er dýrmætara en heilsa og hamingja. Til hvers er fullveldi ef fólki líður illa? Hvað skiptir máli þegar allt kemur til alls?
(Myndirnar hér að ofan eru teknar af Hallfríði Þórarinsdóttur og Heiðu B. Heiðars.)