Það er líklega leitun að meiri hræsnara en Jim Ratcliffe, auðmanninum breska sem hefur verið í óða önn að kaupa jarðir og veiðirétt á Íslandi.
Ratcliffe beitti sér í atkvæðagreiðslunni um Brexit. Hann barðist fyrir því að Bretar gengju úr Evrópusambandinu.
Nú flytur hann hann til Mónakó í því skyni að losna undan því að greiða skatta í heimalandinu. Þetta er maður sem óskapleg auðæfi, umfram það sem fólk getur ímyndað sér – lýsingin á lystisnekkju hans eru með ólíkindum. Náunginn var meira að segja aðlaður um daginn – það er til marks um sérkennilega dýrkun Englendinga á peningum.
En svo er það það nefnilega merkilegt að jarðirnar á Íslandi, meðal annars Grímsstaði á Fjöllum og lendur í Vopnafirði, hefur hann einmitt getað keypt vegna EES-samningsins. Án EES hefði hann ekki mátt kaupa land á Íslandi, þótt hugsanlegt sé að svo moldríkur maður hefði getað fundið einhverjar fléttur til að svindla sér framhjá því.
Þegar Bretland gengur úr Evrópusambandinu verður það ekki lengur aðili að EES. En þá verður Ratcliffe fluttur til Mónakó.