Þeir sem bera hag hvala fyrir brjósti brá mörgum í brún þegar þegar fréttist af því að kálffull langreyður veiddist á dögunum. Í dag greindi Morgunblaðið frá því að samtals 11 fóstur hafi komið í ljós við hvalveiðar í sumar, samkvæmt Kristjáni Loftssyni, forstjóra Hvals hf., og því sé slíkt engin nýlunda.

Líf Magneudóttir, oddviti Vinstri grænna í borgarstjórn, sem komst í fréttirnar fyrir að ulla á borgarfulltrúa Sjálfstæðisflokksins á dögunum, virðist þó hafa komist í nokkuð uppnám við lestur fréttarinnar, því hún skrifar færslu við grein Morgunblaðsins þar sem hún lýsir því yfir að hún vilji friða allar tegundir hvala:

„Þetta er svo mikil sturlun. Ég vil að hvalveiðum verði hætt og að allar hvalategundir verði friðaðar.“

Í lögum um hvalveiðar er bannað að veiða hvalkálfa, en hvergi er bannað að veiða kálffullar hvalkýr, þar sem engin leið er að greina slíkt ástand.

Þess má geta að Lilja Rafney Magnúsdóttir, formaður atvinnuveganefndar og þingmaður Vinstri grænna, hefur sagt hvalveiðar eðlilegar , en viðhorf hennar stangast þó á við samþykktir VG á flokksþingi þess frá 2015, þar sem eindregið er lagst gegn þeim.