Vigdís Hauksdóttir, oddviti Miðflokksins í Reykjavík, segist ætla að skoða réttarstöðu sína eftir ásakanir borgarritara um trúnaðarbrest. Þá líkir hún tungumálinu svokallaða, þegar Líf Magneudóttir, oddviti Vinstri grænna, ullaði á borgarfulltrúa Sjálfstæðisflokksins, við eineltistilburði. Þetta sagði hún í Bítinu á Bylgjunni í morgun, aðspurð hvort þetta hefði ekki bara verið grín hjá Líf:
„Þetta var raunverulegt ull.[…] Það er alltaf sagt svona í eineltismálum, að þetta er nú svona og þolendanum að kenna og allt svoleiðis skiljið þið. Ef þetta hefur verið eitthvað grín, eða þetta hefur verið óvart eða henni hefur verið heitt á tungunni eða eitthvað slíkt, þá átti hún náttúrulega ekki að gera þetta framan í Eyþór Arnalds bara í lok fundarins.Við ætlum að uppræta þessa eineltismenningu í ráðhúsinu. Við erum með sérfræðing, Kolbrúnu Baldursdóttur, sem er sérfræðingur í eineltismálum og vinnusálfræðingur. Þetta er bara búið að vera alltof lengi í ráðhúsinu.“
Þá sagði Vigdís afar þarft að segja frá hverskyns ofbeldi og nefndi #höfumhátt og #metoo í sambandi við ullið hjá Líf:
„Og varðandi tungumálið. Ég held meira að segja að hún (Líf) sé grunnskólakennari. Myndi hún gera þetta í vinnunni sinni ef hún væri í sínu gamla starfi? Ég er ansi hrædd um ekki, að ulla á börnin? En við erum fullorðið fólk og sumir segja að við eigum að geta tekið á þessu, en eigum við þá ekki að rifja upp #höfumhátt, að segja frá ofbeldi sama hvort það sé undir hatti #metoo eða öðru ?“
Vigdís segir einnig að á fyrsta fundi borgarstjórnar hafi illa verið komið fram við Sönnu Magdalenu Mörtudóttur, oddvita Sósíalistaflokksins og þar hafi borgarstjóri ekki verið undanskilinn:
„Meirihlutinn talaði svo niður til hennar að ég þurfti að fara og verja hana á hennar fyrsta fundi og mínum fyrsta fundi.“
Þá gagnrýndi Vigdís einnig hegðun oddvita Vinstri grænna á sama fundi:
„Í tvígang þá rauk til dæmis Líf Magneudóttir á fætur og hljóp út úr salnum og skellti á eftir sér, þegar ég var í ræðustól. Það verður bara að laga þetta! Fólk getur ekki komið svona fram.“
Þá sagði Vigdís að eineltiskúltúrinn væri að fylgja meirihlutanum á nýtt kjörtímabil og nefndi mál Kjartans Magnússonar, fyrrum borgarfulltrúa Sjálfstæðisflokksins, því til sönnunar, en Kjartan lét bóka árið 2016 að hann hefði verið hrakyrtur og svívirtur af þáverandi formanni borgarráðs:
„Það er vitað og komið fram að ákveðnir aðilar sýndu ekki tilhlýðilega hegðun við kjörinn fulltrúa sjálfstæðis á síðasta kjörtímabili, hann hefur stigið fram og sagt frá því. Þetta fylgir þessu fólki yfir á nýtt kjörtímabil sem nú er að hefjast og ef þetta verður ekki stoppað í fæðingu, þá heldur þessi kúltúr á fram í ráðhúsinu.“
Þrátt fyrir allt þetta sagði Vigdís að hún teldi samvinnuna betri í borginni en á tíma sínum í þinginu og sagðist hún bjartsýn á áframhaldandi samstarf, þó svo það liti kannski þannig við út á við, að borgarfulltrúar væru alltaf að rífast:
„Það er bara tekist málefnalega á. […] Við vinnum þetta mjög faglega, þarna er mjög reynslumikið fólk.“
