Kristín Soffía Jónsdóttir, borgarfulltrúi Samfylkingarinnar, viðhafði fleyg orð í síðustu viku um útgöngu fulltrúa Sjálfstæðisflokksins af fundi skipulagsráðs, sem Sjálfstæðismenn töldu ólögmætan. Kristín sagðist aldrei hafa orðið vitni af svo vanhugsuðu og vandræðalegu upphlaupi og fullyrti að Sjálfstæðismennirnir hefðu kosið að brjóta þann trúnað sem ríkti um fundinn:

„Þeim er gert fullkomlega ljóst að trúnaður ríkir um fundinn þar til honum er slitið en þau kjósa að brjóta þann trúnað – svo spennt að komast í fréttirnar. Til hamingju Reykvíkingar, þau brutu trúnað, skrópuðu í vinnunni og misstu af öllum kynningum til þess eins að fá þessa fínu mynd af sér.“

Óháð lögfræðiálit

Fulltrúar minnihlutans lögðu fram óháð lögfræðiálit í bókun sinni á fundi skipulags – og samgönguráðs á föstudag, þar sem komist að þeirri niðurstöðu að fundurinn örlagaríki hafi verið boðaður með ólögmætum hætti, þrátt fyrir ítrekanir meirihlutans um hið gagnstæða. Í kjölfarið létu fulltrúar minnihlutans bóka að þeir krefðust formlegrar afsökunarbeiðni af hendi Kristínar Soffíu:

„Vegna ummæla borgarfulltrúa Kristínar Soffíu Jónsdóttur: Minnihlutinn skora á borgarfulltrúa Kristínu Soffíu að draga ummæli sín til baka og biðjast formlega afsökunar á röngum sakargiftum. Engum trúnaðar upplýsingum var komið á framfæri enda sátu borgarfulltrúar minnihluta ekki fundinn eins og skýrt kemur fram í fundargerð. Það getur ekki staðist að trúnaður sé um þá staðreynd að borgarfulltrúar neiti að taka þátt í fundi sem ranglega er staðið að. Það er okkar skylda að sjá til þess að rétt sé staðið að ákvarðanatöku borgarinnar.“