Þau Aldís Hafsteinsdóttir, bæjarstjóri Hveragerðis og Gunnar Einarsson, bæjarstjóri Garðabæjar, hafa bæði fengið hvatningu til þess að bjóða sig fram til formennsku í Sambandi íslenskra sveitarfélaga á landsþingi þess í lok september:

„Ég hef fengið hvatningu víða frá að undanförnu og er að velta þessu alvarlega fyrir mér. Það er líka gott til þess að vita að aðrir treysti mér í þetta embætti. Ég hef setið í stjórn Sambands íslenskra sveitarfélaga í nokkur ár og verið í bæjarstjóri í tólf ár og tel mig því þekkja viðfangsefnin á sveitarstjórnarstiginu. Einnig heyri ég að ýmsum finnst kominn tími til að kona gegni formennsku,“

segir Aldís í samtali við Morgunblaðið í dag.

Þarf að styrkja stöðuna gagnvart ríkinu

Gunnar segist opinn fyrir starfinu einnig:

„Ég er opinn fyrir formennskunni en hvern kjörnefnd gerir svo tillögu um er bara niðurstaða sem ég tek hver sem hún verður. Það hafa ýmsir komið að máli við mig og hvatt mig í þessu efni. Ég hef verið í stjórn sambandsins síðastliðin í tólf ár og þekki viðfangsefni þess vel. Ég er áfram um að styrkja sveitarfélögin í samskiptum við ríkið þar sem þau hafa í ýmsu tilliti farið halloka síðustu árin. Einnig er mikilvægt að brúa meinta gjá sem hefur verið milli landsbyggðar og höfuðborgarsvæðisins. Ég lít ekki á formennsku út frá kynjasjónarmiðum, heldur fyrst og síðast þarf nýr formaður að styrkja stöðu sveitarfélaganna gagnvart ríkinu.“

Halldór Halldórsson, sem gegnt hefur formennsku undanfarin tólf ár, hyggst hætta afskiptum af sveitastjórnarmálum alfarið.

Á landsþinginu, sem haldið er 26.-28. september eru allir fulltrúar kjörgengir og tæknilega séð í framboði. Hinsvegar gerir uppstillingarnefnd tillögu um formann og tíu manna stjórn, hvar horft er til jafnvægis með tilliti til stjórnmálaflokka, landshluta og kynja. Miðað er við að tveir fulltrúar komi frá hverju kjördæmi í stjórn, en þrír frá Reykjavík.