Össur Skarphéðinsson, fyrrum utanríkisráðherra og formaður Samfylkingarinnar, slær á létta strengi í umfjöllun sinni um Líf Magneudóttur, oddvita VG í borgarstjórnarmeirihlutanum og ákvörðun hennar um að reka út úr sér tunguna í átt að Mörtu Guðjónsdóttur, borgarfulltrúa Sjálfstæðisflokksins:

„Á ástríðulausum tímum er gleðilegt að sjá að í borgarstjórn Reykjavíkur grípur fólk til nýstárlegra ráða til að létta hvort öðru lífið. Góðar konur ulla hver á aðra til að “létta andrúmsloftið” einsog ullarinn útskýrði frægt ull á örmiðli sínum. Þetta er mikil framför frá háttsemi alþingismanna. Þar kom fyrir að menn rifu í eyrun hvor á öðrum og slitu þau næstum af í hita leiksins.“

Blóðug átök á Alþingi

Össur greinir frá því er hann fór sjálfur yfir strikið í ræðu og galt fyrir með sparki:

„Sjálfur fór ég eitt sinn yfir æskileg mörk kaldhæðninna í vondri ræðu. Á eftir var mér sparkað í bókstaflegri merkingu niður stigann í Alþingishúsinu. Í minningu þessa atburðar, sem líklega voru síðustu blóðugu átökin á Alþingi, gáfu Vestmannaeyingar mér síðar risastórar nærbuxur með tröllstóru fótspori. Ég lifði þetta af, og einhvers staðar á ég nærbuxurnar góðu. Mér finnst ekki ólíklegt að Sjálfstæðisflokkurinn lifi af ull hins geðríka en geðþekka borgarfulltrúa, Lífar Magneudóttur. En ef einhver tapar svefni er áfallahjálp reynds manns í boði á Vesturgötunni….“