Mynd dagsins er upprifjun á frétt frá árinu 2015 sem sýnir hvernig Svíar taka á móti flóttamönnum. Á henni má sjá flóttabörn í sögustund hjá sænskri lögreglukonu á gólfi aðaljárnbrautarstöðvarinnar í Malmö. Myndin fór sigurför um netheima enda ótrúlega fallegt augnablik sem þarna var fest á mynd.
Terese Lago, lögreglukona í Malmö, gaf sér tíma til að setjast hjá flóttabörnum, sem voru nýkomin til Malmö, og lesa fyrir þau. Hún sagði við fjölmiðla að lögreglumenn yrðu að sýna fagmennsku í störfum sínum með flóttamennina en það væri ekki hægt annað en að verða fyrir áhrifum af því sem fólkið hefur gengið í gegnum.
Hún sagðist hafa viljað sýna börnunum og foreldrum þeirra að sænska lögreglan væri góð. Fólkið hafi kannski þurft að þola slæma meðferð af hálfu lögreglunnar í öðrum löndum. Hún sagði einnig að dóttir hennar komi oft upp í hugann þegar hún sér lítil börn á flótta liggjandi á gólfi lestarstöðvarinnar.