Björn Brynjúlfur Björnsson er nýr formaður Félags viðskipta – og hagfræðinga (FVH) og tekur við því hlutverki af Dögg Hjaltalín. Björn er sjálfstætt starfandi og var áður hagfræðingur og aðstoðarframkvæmdastjóri Viðskiptaráðs Íslands. Þar áður starfaði hann fyrir ráðgjafarfyrirtækið McKinsey & Company. Björn er með BS-próf í verkfræði frá Háskóla Íslands og meistarapróf í hagfræði frá University of Oxford.
Katrín Amni Friðriksdóttir hefur tekið við starfi framkvæmdastjóra Félags viðskipta- og hagfræðinga. Katrín hefur starfað við markaðsmál og ráðgjöf undanfarin ár. Þar áður starfaði hún sem markaðsstjóri Heilsuhússins og Lyfju. Katrín er með BS-próf í hagfræði frá Háskóla Íslands og meistarapróf í lúxusstjórnun frá Domus Academy í Mílanó.
Félag viðskipta- og hagfræðinga er fagfélag háskólamenntaðs fólks á sviði viðskipta- og hagfræða á Íslandi. Félagið heldur reglulega viðburði, gefur út tímaritið Hag, veitir viðurkenningar, og framkvæmir kjarakönnun fyrir félagsmenn. Þeir sem lokið hafa prófi frá viðurkenndum háskóla í viðskipta- eða hagfræði geta gengið í félagið.
Ný stjórn félagsins hefur einnig verið kjörin fyrir starfsárið 2018-2019.
Í stjórninni sitja tíu einstaklingar og tóku fjórir nýir sæti í ár. Hana skipa:
• Björn Brynjúlfur Björnsson, formaður
• Vala Hrönn Guðmundsdóttir, varaformaður
• Ásdís Kristjánsdóttir
• Hallur Jónasson
• Herdís Helga Arnalds
• Íris Hrannardóttir
• Lilja Gylfadóttir
• Magnús Þorlákur Lúðvíksson
• Sölvi H Blöndal
• Þórarinn Hjálmarsson
