„Þingforseti hefur m.a. það hlutverk að skipuleggja þingstörfin, í samstarfi við fulltrúa annarra flokka og stjórna þingfundum en er hins vegar ekki yfirmaður þingmanna,“ skrifar Logi Einarsson, formaður Samfylkingarinnar á Facebooksíðu sína í gær.

Tilefni skrifanna er afsökunarbeiðnin sem Steingrímur sendi Piu Kjærsgaard í kjölfar hins örlagaríka Þingavallafundar í síðustu viku, þar sem Steingrímur baðst afsökunar á þeirri „forkastanlegu“ „vanvirðingu“ sem henni var sýnd þegar Píratar sniðgengu fundinn með öllu og Helga Vala Helgadóttir gekk „út“ er ræða Piu hófst.

Logi segir það ekki við hæfi að Steingrímur biðjist afsökunar á þingmönnum Samfylkingarinnar:

„Hann er vissulega valinn með atkvæðum þorra þeirra í trausti þess að hann sé forseti alls þingsins. Er þó tilnefndur af stjórnarflokkunum og greiðir oftast atkvæði með sínum flokki og tekur til máls eftir því sem hann sjálfur kýs. Mér finnst því ekki við hæfi að forseti þingsins, sem er fulltrúi tiltekins flokks, biðjist afsökunar á þingmönnum úr öðrum flokkum, þar með talið mínum.“

Þá stingur Logi upp á að taka upp verklag skoska þjóðþingsins:

„Kannski væri hugmynd að við tækjum upp verklag skoska þjóðþingsins. Þar stendur forseti utan flokka, afsalar sér atkvæði sínu(nema við mjög sérstakar aðstæður) og þannig birtist hann kannski frekar sem raunverulegur forseti alls þingheims.“