„Fundurinn var haldinn í miðri viku þegar fólk er almennt við vinnu. Dagskráin var heldur ekki líkleg til að vekja brennandi áhuga, þar sem hún samanstóð aðallega af ræðuhöldum alþingismanna. Við það bættist að þjóðinni hafði verið tilkynnt að þegar hún væri komin til Þingvalla skyldi hún halda sig á ákveðnu svæði, í dágóðri fjarlægð frá þingmönnum og fínni gestum. Þingmenn eru ekki náttúruundur þannig að almenningur sá enga ástæðu til að mæta og horfa á þá aðdáunaraugum úr hæfilegri fjarlægð,“ skrifar Kolbrún Bergþórsdóttir í leiðara Fréttablaðsins í dag en hún telur að hátíðarfundur Alþingis á Þingvöllum á miðvikudag hafi verið klúður.
„Hátíðarfundurinn á Þingvöllum var klúður. Þjóðin mætti ekki. Sennilega hafði hún á tilfinningunni að henni væri helst ætlað að vera í hlutverki statista fyrir sjónvarpsmyndavélar,“ skrifar Kolbrún enn fremur.
Þá segir Kolbrún að óþarfi hafi verið að velja jafn umdeildan gest á fundinn og Piu Kjærsgaard, forseta danska þingsins, en skoðanir hennar á innflytjendum og flóttafólki vekja gremju margra. Kolbrún segir hins vegar að þessar skoðanir hafi ekki verið til umfjöllunar í ræðu hennar á Þingvöllum og ekkert í ræðinni hafi gefið tilefni til upphlaups.
Alltaf má búast við upphlaupum hjá Pírötum og Samfylkingu
Þá skrifar Kolbrún:
„Forseti Alþingis, Steingrímur J. Sigfússon, segir að lengi hafi legið fyrir að Kjærsgaard myndi halda ræðu á fundinum og furðar sig á hörðum viðbrögðum einstaka flokka og þingmanna. Furða hans vekur furðu. Ef hann sá ekki sjálfur í upphafi hversu umdeild þessi ákvörðun myndi verða, sérstaklega hjá upphlaupsflokkum eins og Pírötum og Samfylkingu, hefði einhver átt að segja honum það.“