Svandís Svavarsdóttir, heilbrigðisráðherra, er gagnrýnin á ljósmæður fyrir að hafna hverju samningstilboðinu á fætur öðru. Koma ummæli Svandísar í kjölfar þess að ljósmæður höfnuðu sáttatillögu ríkissáttasemjara í gær. Fréttablaðið greinir frá.
„Staðan er grafalvarleg og verulegt umhugsunarefni að ljósmæður hafni hverju lausnarúrræðinu á fætur öðru,“ sagði Svandís við Fréttablaðið Hún segir ótímabært að ræða um að setja lög á verkfallið, segir að slík úrræði hafi ekki komið til tals.
Meðgöngu- og sængurdeild Landspítalans hefur verið lokað af stjórnendum spítalans og sameinað hana starfi kvenlækningadeildar, samkvæmt Fréttablaðinu.
Katrín Sif Sigurgeirsdóttir, formaður samninganefndar ljósmæðra, segir að ljósmæður séu neyddar til þess að vinna yfirvinnu, þrátt fyrir að vera í yfirvinnuverkfalli:
„Við höfum heyrt af mögulegum verkfallsbrotum. Ef rétt reynist eru þetta gróf verkfallsbrot þar sem ljósmæður hafa hreinlega verið neyddar til að vinna. Þetta er í skoðun hjá okkur. Boltinn er í höndum stjórnvalda og brennur væntanlega þar.“
Samkvæmt Bryndísi Hlöðversdóttur ríkissáttasemjara, er ekki ástæða til að boða til nýs fundar nema eitthvað nýtt komi fram.
Þá segist Fréttablaðið hafa heimildir fyrir því að sex ljósmæður hafi sagt upp störfum á síðustu dögum.