Það sem af er ársins hefur verið metsala á heitu vatni á höfuðborgarsvæðinu. Notkunin á fyrstu sex mánuðunum hefur verið 10% meiri en að meðaltali, sé litið til næstu fjögurra ára á undan. Í fjórum af þeim sex mánuðum sem liðnir eru af árinu hefur notkunin verið meiri en árin á undan, mest í janúar og júní. Þetta kemur fram í tilkynningu frá Veitum.
Dagana 16. – 23. janúar fóru að jafnaði 15.161 rúmmetrar á klukkustund í gegnum hitaveitu Veitna á höfuðborgarsvæðinu sem er mesta vikunotkunin sem sést hefur. Met í sólarhringsnotkun og notkun á klukkustund voru einnig slegin í janúar.
Ástæða þessarar aukningar á notkun á heitu vatni ætti ekki að koma íbúum á höfuðborgarsvæðinu á óvart. Kuldatíð í janúar og febrúar og einstaklega rysjótt tíð í maí og júní á suðvesturhorni landsins hefur ekki farið fram hjá neinum. Þess utan hefur notkun á heitu vatni aukist mikið á síðustu árum, eða um tæplega 20% á síðustu fimm árum.
Ekki er langt síðan önnur met voru slegin í heitavatnsnotkun á höfuðborgarsvæðinu. Nóvember sl. var metmánuður en aldrei áður hefur verið notað jafn mikið heitt vatn í þeim mánuði. Þá runnu tæpir níu milljaðar lítra frá hitaveitu Veitna en það þjónar íbúum allt frá Mosfellsbæ í norðri og til Hafnarfjarðar í suðri en á svæðinu búa um 70% landsmanna.
Stærsti hluti heita vatnsins, eða um 90%, fer til hús¬hit¬un¬ar. Til að spara og lækka reikninginn hjá sér er rétt að horfa til hennar. Mikilvægt er að hafa hitakerfið í góðu lagi, ofna rétt stillta, húsin vel einangruð og glugga ekki meira upp á gátt en þörf krefur. Fækkun baðferða eða þvotta bætir ekki miklu í budduna þegar kemur að hitaveitureikningnum enda kostar góð sturta eða baðferð aðeins nokkrar krónur.
Verð á húshitun er lágt í Reykjavík og langt undir meðaltali höfuðborga grannríkjanna á Norðurlöndunum. Fimmfalt dýrara er fyrir íbúa í Helsinki að hita húsið sitt en fyrir íbúa í Reykjavík. Íslendingar hita húsin sín mikið en við verjum hlutfallslega minnst af ráðstöfunartekjum okkar í það.
Heita vatnið sem notað er á höfuðborgarsvæðinu kemur annars vegar frá lághitasvæðum í Mosfellsbæ og Reykjavík (Laugarnesinu og Elliðaárdal) og hins vegar frá háhitasvæðum á Nesjavöllum og nýjasta viðbótin kom á árinu 2010 þegar heitavatnsframleiðsla hófst í Hellisheiðarvirkjun.