Það vakti mikla athygli þegar Helga Vala Helgadóttir, þingkona Samfylkingarinnar, gekk útaf hátíðafundi á Þingvöllum þegar Pia Kjærsgaard, forseti danska þingsins, ávarpaði samkomuna í gær. Var þingkonunni víða hampað fyrir táknræn mótmæli sín en andstæðingar sökuðu hana um „dónaskap og sýndarmennsku“, svo vitnað sé í orð Gunnars Braga Sveinssonar, þingmanns Miðflokksins.
Þá hefur ekki síður vakið athygli að Helga Vala mætti prúðbúin til leiks í veislu síðar um kvöldið ásamt eiginmanni sínum, Grími Atlasyni. Þar sat áðurnefnd Pia Kjærsgaard í öndvegi og ávarpaði samkomuna eins og fundinn fyrr um daginn. Birti Eiríkur Jónsson stuttan fréttamola á vef sínum fyrr í dag þar sem Helga Vala var sökuð um tvískinnung að hafa mætt í hófið.
„Það var blásið til þessarar veislu til þess að halda upp á 100 ára afmæli samnings um fullveldi Íslands og þessvegna taldi ég fulla ástæðu til að taka þátt í þeim hátíðahöldum. Hvað varðar hennar þátttöku í þeim þá kaus ég að nota mína rödd á þann veg að ég valdi að hlusta ekki á hennar boðskap, sem í gegnum tíðina hefur einkennst af mannhatri, sérstaklega í garð fólks sem getur ekki borið hönd fyrir höfuð sér,“ segir Helga Vala.
Hún segist hafa brugðist við á sama hátt í gærkvöldi og á Þingvöllum fyrr um daginn. „Ég gekk líka út úr salnum þegar hún ávarpaði veisluna í gær. Ég virði rétt hennar til þess að hafa skoðanir en ég virði ekki skoðanir hennar,“ segir Helga Vala.