Óli Björn Kárason, þingmaður Sjálfstæðisflokksins, gagnrýnir ný persónuverndarlög á Facebook-síðu sinni í dag. Tilefnið er að Kauphöllin, Nasdaq Ísland hyggst hætta að birta lista yfir 20 stærstu hluthafa í fyrirtækjum, vegna hinna nýju persónuverndarlaga, en Kauphöllin telur að listinn uppfylli ekki skilyrði laganna. Félögin munu sjálf geta birt listana á sínum heimasíðum, liggi samþykki hluthafanna fyrir.
Óli Björn er gagnrýninn á þessi nýju lög:
„Þetta er eitthvað öfugsnúið. Ef ný persónuverndarlög verða til þess að minnka gegnsæi á hlutabréfamarkaði er þau að vinna gegn heilbrigðum viðskiptaháttum. Það tók áratugi að berjast fyrir því að stærstu fyrirtæki landsins birtu hluthafalista sína. Hörður Sigurgestsson, þáverandi forstjóri Eimskipafélagsins braut ísinn. Heilbrigður og öflugur hlutabréfamarkaður er mikilvægur en forsenda þess er að traust ríki. Og traust næst ekki nema gegnsæi sé tryggt.“
Samkvæmt Fréttablaðinu hefur eitt skráð hlutafélag, fasteignafélagið Reginn, tekið listann úr birtingu á heimasíðu sinni. Önnur félög eru enn með listann í opinberri birtingu.