„Alkunna er að þingmenn Pírata taka treglega afstöðu til mála á alþingi af því að þeir hafa ekki tök á að kynna sér þau til hlítar. Jón Þór Ólafsson situr í forsætisnefnd alþingis fyrir pírata og veit ekki heldur hvað þar fer fram.“
Þetta segir Björn Bjarnason fyrrverandi ráðherra Sjálfstæðisflokksins á Facebook-síðu sinni. Þar gagnrýnir hann Pírata harðlega. Píratar sniðgengu Þingvallafundinn í gær vegna þess að Pia Kjærsgaard, forseti danska þingsins hélt þar hátíðarræðu. Fram hefur komið hjá Jóni að forsætisnefnd hafi ekki verið upplýst sérstaklega um komu Piu fyrr en deginum áður en fundurinn fór fram. Sagði Jón það óeðlileg vinnubrögð. Jón Þór hefur sent Steingrími J. Sigfússyni forseta Alþingis spurningar í fjórum liðum um hvenær sú ákvörðun hafi verið tekin. Steingrímur hefur harmað að heimsóknin hafi varpað skugga á hátíðarhöldin og telur mótmælin vera minnihlutasjónarmið.
Þá hefur verið bent á að á vefsíðu Alþingis þann 20. apríl hafi komið fram að Pia Kjærsgaard yrði sérstakur gestur hátíðarinnar og myndi flytja þar ávarp og kveðju frá dönsku þjóðarinnar. Jón Þór situr í forsætisnefnd ásamt Steingrími. Björn Bjarnason bendir á tilkynninguna á vef Alþingis og segir:
„Nú spyr Jón Þór hvort Steingrímur J. Sigfússon líti svo á að birting tilkynningar á vef alþingis 20. apríl síðastliðinn fullnægi upplýsingaskyldu hans til forsætisnefndar og formanna þingflokka alþingis. Netflokkurinn píratar vill sérlegar tilkynningar til sín en ekki þurfa að lesa texta á netinu með öllum almenningi. Vitleysan er endalaus.“