Bjarni Benediktsson, fjármálaráðherra, sendi Pírötum pillu á Facebook vegna ákvörðunar þeirra um að sniðganga Þingvallarfundinn í dag. Píratar gerðu það í ljósi þess hvernig Pia Kjærsgaard, forseti danska þingsins, sem hélt hátíðarræðu með aðstoð túlks á Þingvallarfundinum, hefur talað gegn innflytjendum í Danmörku.

Bjarni nefnir Pírata ekki á nafn, en engum dylst við hverja er átt:

„En svo er það umræða dagsins. Það er til fólk sem slær reglulega um sig með því að leggja áherslu á lýðræðið. Vilja fólksins. Frelsi hins almenna kjósanda til að koma skoðunum sínum að. Í því samhengi er reglulega rætt um rétt minnihlutans til að koma sjónarmiðum sínum á framfæri og hafa áhrif. Í flestum ríkjum er þetta tryggt með almennum, frjálsum kosningum og byggt á fulltrúalýðræði. Það er hins vegar svo að þegar á reynir er eins og þetta sama fólk eigi erfiðast með að virða niðurstöðu þeirra leikreglna sem best tryggja lýðræðislega niðurstöðu. Það hikar ekki við að segja tiltekna rétt kjörna einstaklinga óalandi og óferjandi, jafnvel með öllu óvelkomna og óhæfa til samskipta. Þegar Alþingi Íslendinga býður forseta danska þjóðþingsins til að vera viðstaddur hátíðarhöld vegna sögulegra tímamóta finnst þessu fólki þannig við hæfi að útiloka viðkomandi einstakling, kosinn í frjálsum almennum kosningum.“

Bjarni segist ekki deila skoðunum Piu og hafi skilning á því að fólk hafi skoðun og sé ósammála áherslum hennar. En…:

„..það er óskylt lýðræðinu að virða ekki embætti danska þingsins. Það er yfirlæti og beinlínis dónaskapur gagnvart danska þjóðþinginu og dönsku þjóðinni. Það er mitt viðhorf.“