Alls bárust 20 umsóknir um stöðu bæjarstjóra Grindavíkurbæjar, en umsóknarfrestur um starfið var til 11. júlí. Bæjarráð fór yfir málið á fundi sínum í gær og mun vinna málið áfram í samvinnu við ráðninga- og ráðgjafafyrirtæki Hagvang sem heldur utan um ferlið, að því er fram kemur á heimasíðu Grindavíkurbæjar.
Meðal umsækjenda eru Björn Ingi Jónsson, fyrrum bæjarstjóri Hornarfjarðar, sem er í ótímabundnu leyfi frá bæjarstjórn þar. Þá er Fannar Jónasson, bæjarstjóri Grindavíkurbæjar, einnig meðal umsækjenda, sem og Ólafur Örn Ólafsson, fyrrum bæjarstjóri í Grindavík og Ölfusi. Þá er Þorsteinn Gunnarsson, sveitastjóri Skútustaðarhrepps, einnig meðal umsækjenda.
Sjálfstæðisflokkur og Framsóknarflokkurinn eru í meirihluta bæjarstjórnar. Fannar Jónasson var ráðinn bæjarstjóri í byrjun árs 2017 og tók við af Róberti Ragnarssyni, sem var látinn taka poka sinn, meðal annars vegna ákvörðunar sinnar um að leigja út húsnæði sitt í Grindavík á Airbnb og flytja á endanum til Reykjavíkur.
Magnús Már Jakobsson, formaður Verkalýðsfélags Grindavíkur, hefur sínar skoðanir á örum bæjarstjóraskiptum í sveitarfélaginu. Hann segir ekki alla flokka fá að koma á ráðningunni og spyr hvað verið sé að fela:
„Saga bæjarstjóra Grindavíkur Frá því að ég kom til Grindavíkur 1997. Jón Gunnar ráðinn af Sjálfstæðisflokk og rekinn af Framsókn sem ræður Einar Njálsson sem var virkilega vel liðinn í bænum svo komust Sjálfstæðismenn til valda og ráku hann og réðu Ólaf Örn sem var rekin af framsókn og Samfylkingu sem réðu Jónu Kristínu sem sjálfstæðismenn ráku og réðu aftur Ólaf Örn sem var svo rekinn næst þegar framsókn komst til valda sem svo réðu Róbert Ragnars sem var svo rekin af sjálfsstæðismönnum sem brugðu á það ráð að ráða Fannar um mitt síðasta tímabil og núna fara framsóknarmenn fram á að hann verði rekinn og sjálfstæðismenn ætla að lúffa fyrir framsókn þó svo að sjálfstæðismenn séu þrír á móti einum framsóknarmanni. Reyndar hef ég heyrt að Gummi tannlæknir sé í liði með framsókn í þessu máli. Fyrir mig sem íbúa í Grindavík lítur þetta alls ekki vel út. Finnst ykkur kæri meirihluti bæjarstjórnar Grindavíkur það skrítið að fólkið sé farið að gera grín af ykkur? Til að kóróna allt allt saman þá fá ekki allir flokkar að koma að ráðningaferlinu á nýjum bæjarstjóra. Hvað er verið að fela núna.“
Umsækjendur í stafrófsröð:
Anna Greta Ólafsdóttir – Stofnandi og sérfræðingur stjórnendalausna
Ármann Jóhannesson – Ráðgjafi
Áróra Jóhannsdóttir – Eigandi / sölumaður
Baldur Þ. Guðmundsson – Útibússtjóri
Bjarni Óskar Halldórsson – Framkvæmdastjóri
Björn Ingi Jónsson – Bæjarstjóri
Fannar Jónasson – Bæjarstjóri
Guðrún Pálsdóttir – Verkefnastjóri
Gunnar Bjornsson – Forseti í fullu starfi / verkefnastjóri
Hjördís Dröfn Vilhjálmsdóttir – Nefndarmaður
Matthias Magnusson – Framkvæmdastjóri
Ólafur Örn Ólafsson – Fv. bæjarstjóri
Ómar Smári Ármannsson – Aðstoðaryfirlögregluþjónn
Rebekka Hilmarsdóttir – Lögfræðingur/Staðgengill skrifstofustjóra
Regina Fanny Gudmundsdóttir – Deildarstjóri reikningshalds
Sveinbjörn Freyr Arnaldsson – Framkvæmdastjóri
Valdimar Leó Friðriksson – Framkvæmdastjóri
Þórður Valdimarsson – Verkefnastjóri
Þorsteinn Gunnarsson – Sveitarstjóri
Þórunn Inga Ingjaldsdóttir – Framkvæmdastjóri íþróttasviðs
