Samkvæmt íslenskri reglugerð um hvalveiðar frá 1973 er bannað að veiða steypireyði. Eins og Eyjan hefur fjallað um, þá veiddi Hvalur hf., fyrirtæki Kristjáns Loftssonar, hval sem talinn var steypireyður. Hvalfriðunarsamtök höfðu hátt vegna málsins og Sea Shepeard með Paul Watson í broddi fylkingar sendu öllum alþingismönnum bréf til að láta vita af þessu ólöglega athæfi.
Til álita kom þó hvort um steypireyði væri að ræða, eða blending, afkvæmi steypireyðar og langreyðar, en blendingar eru ekki friðaðir. Óskað hefur verið eftir flýtimeðferð á greiningu á erfðasýni hvalsins, en Kristján Loftsson segir sjálfur að um blending sé að ræða, og hann sé sá fimmti sem veiðist síðan 1987.
Árni Stefán Árnason, sérfræðingur á sviði dýraverndunarlaga, segir í Morgunblaðinu í dag að refsiákvæðið við veiðum á steypireyði sé gilt:
„Þetta eru gömul lög og hefur líklegast aldrei áður reynt á þau. Þetta myndi teljast mikil sök, dráp á friðuðu dýri. Að mínu mati gildir þetta refsiákvæði, en ég tel það ekki munu hafa neitt að segja í þessu tilviki. Stjórnvöld munu ekki vilja fylgja þessu eftir, m.a. vegna sterkrar tengingar hvalveiða við ríkisvaldið.“
Í reglugerðinni er kveðið á um að brot á henni varði sektum og öðrum viðurlögum sem tilgreind eru í lögum nr. 26 um hvalveiðar frá árinu 1949.
Þar segir að brot gegn lögunum geti varðað sektum frá 2000-40000 gullkróna. Og ef sakir eru miklar, allt að 6 mánaða fangelsi.
Þá hefur utanríkisráðuneytið fylgst vel með málinu og leiðrétt ýmsar rangfærslur um málið sem birtast í erlendum fjölmiðlum:
„Við höfum fundið fyrir nokkrum áhuga hjá erlendum miðlum sem margir hverjir hafa tekið málið upp. Við höfum verið að koma afstöðu Íslands á framfæri og sérstaklega þar sem farið hefur verið með rangfærslur. Í þeim tilvikum höfum við upplýst fólk á hvaða grundvelli reglugerðin um hvalveiðar er gefin út. Það er mikilvægt að erlendir fjölmiðlar geri sér grein fyrir því að veiðar á steypireyðum eru bannaðar á Íslandi. Eins að málið sé tekið alvarlega hér á landi og verið sé að flýta greiningu,“
segir María Mjöll Jónsdóttir, deildarstjóri upplýsinga- og greiningardeild utanríkisráðuneytisins, við Morgunblaðið.