Stundin greinir frá því að tveir þingmenn og einn ráðherra, drýgi tekjur sínar með því að leigja út íbúðir sínar til heimagistingar. Annar til hefur sótt um leyfi til heimagistingar.
Ágúst Ólafur Ágústsson, þingmaður Samfylkingarinnar, Helgi Hrafn Gunnarsson, þingmaður Pírata og Þorsteinn Víglundsson, þingmaður Viðreisnar, eru allir skráðir ábyrgðarmenn íbúða samkvæmt gögnum sýslumannsins á höfuðborgarsvæðinu og þeir Ágúst Ólafur og Helgi Hrafn leigja út íbúðir á vefnum Airbnb. Íbúð Þorsteins er ekki að finna á Airbnb.
Þá er Ágústa Johnson, eiginkona Guðlaugs Þórs Þórðarsonar, utanríkisráðherra, skráð ábyrgðarmaður íbúðar sem er til útleigu á Airbnb einnig, en gestgjafinn í þeirri íbúð er dóttir þeirra hjóna. Íbúðin er skráð í eigu Guðlaugs Þórs og Ágústu.
Flestir, ef ekki allir þessir stjórnmálamenn hafa í gegnum tíðina talað um áhyggjur sínar af húsnæðis- og leiguverði og áhrifa Airbnb á markaðinn, sem samkvæmt Seðlabanka Íslands stóð fyrir 15% raunverðshækkun íbúðaverðs frá 2014-2017.
Nóttin í íbúð Guðlaugs Þórs kostar 17 þúsund krónur og hefur verið í leigu síðan í maí, en er ekki laus að ráði fyrr en í október, samkvæmt frétt Stundarinnar.
Henni er lýst sem 2ja herbergja, nýuppgerðri íbúð, sem er öllu hófstilltari lýsing en á húsnæði Ágústs Ólafs. Því er lýst sem „lúxus“ húsi með bar, eldstæði og heitum potti, en húsnæðið er 270 fermetrar, með „leynibar“ og kostar nóttin rúmar 40.000 krónur.
Íbúð Helga Hrafns er sögð „vagga kattaunnandans“ og kostar nóttin 13 þúsund krónur, en tveir kettir fylgja með íbúðinni.
Þorsteinn Víglundsson er ekki skráður með húsnæði á Airbnb, en er einn þeirra 1448 sem sótt hafa um leyfi um heimagistingu.
Í athugasemdarkerfi Stundarinnar er bent á að ef útleigan á húsnæði þingmannanna sé aðeins í boði meðan þeir séu í fríi, auki það alls ekki húsnæðisvandann líkt og margir haldi, heldur þvert á móti, sé hluti af deilihagkerfi sem gagnist öllum, nema þá helst eigendum hótela og annarra gistirýma.
Á hinn bóginn virðist það algeng skoðun í athugasemdarkerfinu og á samfélagsmiðlum, að þingmenn eigi ekki að þurfa að drýgja tekjurnar með þessum hætti og bent er á hræsnina sem felst í því að leigja út húsnæði sitt á Airbnb annarsvegar, en finna síðan blóraböggla fyrir ástandinu á húsnæðismarkaði í ræðu og riti hinsvegar.
Þess má geta til gamans, að laun þingmanna eru 1,101 þúsund krónur á mánuði og ráðherralaun eru 1,826 þúsund krónur á mánuði, samkvæmt úrskurði kjararáðs frá 2016.