Samkvæmt Helga Bernódussyni, skrifstofustjóra Alþingis, mun kostnaður við hátíðarþingfund Alþingis á Þingvöllum á morgun, í tilefni af aldarafmæli fullveldis Íslands, nema um 70-80 milljónum króna. Í rekstraráætlun vegna fundarins er gert ráð fyrir að kostnaðurinn sé um 45 milljónir, en gæti orðið meiri eftir umfangi, samkvæmt svari Steingríms J. Sigfússonar, forseta Alþingis, við fyrir spurn Björns Leví Gunnarssonar, þingmanns Pírata, frá því í júní. Þetta kemur fram í Fréttablaðinu.

Kostnaðurinn fer því allt að 78 prósentum fram úr áætlun.

Kostnaðurinn felst meðal annars  í skipulagningu, sem taka þarf mið af því að viðburðurinn verði í beinni útsendingu og sérstakir pallar verða settir upp af því tilefni. Þá eru boðsgestir Alþingis, forseti Íslands, þingforsetar Norðurlanda og Eystrasaltsríkjanna sem þurfa öryggisgæslu og um kvöldið verður hátíðarkvöldverður sem þingmönnum og gestum er boðið til þar sem gera má ráð fyrir að engu verði til sparað.