Ármann Kr. Ólafsson, bæjarstjóri Kópavogsbæjar, mun í dag kynna fyrir samráðsfundi Sameinuðu þjóðanna hvernig Kópavogur notar vísitölu félagslegra framfara (VFF) til að fylgjast með framgangi áætlana bæjarins á innleiðingu heimsmarkmiða sameinuðu þjóðanna. Kópavogsbær er frumkvöðull í þessari nálgun, þar sem mældir eru félagslegir þættir í stað efnahagslegra:
„Það er ný nálgun hjá okkur að mæla árangur þar sem ekki er unnið út frá efnahagslegum forsendum heldur félagslegum þáttum. Teknir eru út þættir sem við viljum mæla og varða líðan íbúa. Mælingar VFF hjálpa til við að fylgjast með því hvernig til tekst að ná heimsmarkmiðum Sameinuðu þjóðanna. Mælikvarðinn hefur verið notaður af einstaka þjóðum en aldrei af sveitarfélagi af okkar stærð og er því um frumkvöðlastarf að ræða. Notkun vísitölunnar á að skila sér í að þjónustan við íbúana verði betri, verkefnin markvissari og þar með fjárhagsáætlanagerðin. Vísitalan er nýleg aðferð til þess að mæla styrkleika samfélagslegra innviða Kópavogs. Vinnan við undirbúning notkunar á vísitölunni hófst 2017 og fyrsta skorkortið var birt í vor. Niðurstöður mælinganna notum við í frammistöðumati á framkvæmdir og til að styrkja stýringu og skilvirkni opinberrar fjárfestingar,“
sagði Ármann við Morgunblaðið.
Á heimasíðu Kópavogsbæjar segir að nálgunin hafi vakið mikla athygli hjá Social Progress Imperative stofnuninni, en bærinn hefur látið smíða sérstakan hugbúnað sem byggir á þáttum vísitölunnar ásamt miklu magni af gögnum sem eru fyrirliggjandi um fjölbreyttan rekstur bæjarins. Því sé að verða til einskonar „lifandi mælaborð“ þar sem hægt að er fylgjast með af meiri nákvæmni en áður hvort ýmis verkefni og framkvæmdir skili sér í bættum hag íbúanna.
Auk bæjarstjóra Kópavogs verða fyrirlesarar á fundinum meðal annars efnahags- og samfélagsmálaráðherra Paraguay, fastafulltrúi Kosta Ríka hjá Sameinuðu þjóðunum og framkvæmdastjóri Social Progress Imperative stofnunnar.
Hinn árlegi pólitíski umræðuvettvangur er haldinn af Endurskoðun á efnahags- og félagsmálanefnd Sameinuðu þjóðanna (The Economic and Social Council – ECOSOC) sem ber meginábyrgð á að hvetja til og samræma innleiðingu heimsmarkmiðanna 17, bæði gagnvart aðildarríkjum og innan SÞ kerfisins en þau eru eftirfarandi:
Hér að neðan má sjá myndband frá heimasíðu Kópavogsbæjar, sem segir frá verkefninu sem hlaut viðurkenningu Sambands íslenskra sveitarfélaga fyrir nýsköpun í opinberri þjónustu og stjórnsýslu í júní síðastliðnum.