Ein sameiginleg stefna fyrir fjarskipti, póstmál, netöryggismál og málefni Þjóðskrár Íslands er nú í undirbúningi í samgöngu- og sveitarstjórnarráðuneytinu. Af því tilefni bauð ráðuneytið til stefnumótunarfundar í dag þar sem saman komu helstu hagsmunaaðilar, framkvæmdaaðilar og samstarfsaðilar ráðuneytisins í þeim málaflokkum sem hin nýja stefna mun ná til, samkvæmt tilkynningu.
Í ávarpi Sigurðar Inga Jóhannssonar, ráðherra samgangna- og sveitarstjórnarmála, kom fram að netöryggi á Íslandi væri hægt að stórbæta með því að sýna metnað:
„Nú, – fundargestir góðir, spyr ég, eigum við ekki að yfirfæra reynslu okkar af árangursríkri nálgun á fjarskiptamálin yfir á netöryggismálin, póstmálin og málefni Þjóðskrár Íslands? Er nokkur ástæða til að ætla annað en við getum stórbætt stöðu okkar í þessum málaflokkum með því að sýna metnað, móta skýr stefnu og fylgja henni skipulega og fast eftir?“
Sigurður Ingi sagði einnig að áskoranirnar framundan væru óljósar, en framundan væri mikið verk þegar kæmi að netöryggi:
„Þau viðfangsefni eða þær áskoranir sem við sem þjóð stöndum frammi fyrir á næsta áratug eru að mörgu leyti óljósar. Tæknileg umbreyting íslensks samfélags er hér undir, hvorki meira né minna. Fjarskiptin eru grunnurinn sem allt byggir á í fjórðu iðnbyltingunni, í 5g og Interneti hlutanna. Og útbreiðsla og notkun tækninnar er háð því að fólk og fyrirtæki treysti tækninni og því að viðkvæmar upplýsingar komist ekki í hendur óviðkomandi. Þar kemur netöryggið inn í dæmið. Ráðuneytið hefur verið að undirbúa frumvarp um netöryggismálin sem nú er búið að birta til umsagnar í samráðsgátt ráðuneytanna en mikið verk er framundan við að auka öryggi upplýsinga, ýmissa grunnkerfa samfélagsins og neta. Þessi mál verða eðlis síns vegna að vera í forgangi.“
Í ávarpi ráðherra kom m.a. fram að nú í upphafi kjörtímabilsins séu stefnumótunarverkefni í forgangi og í lok ársins muni liggja fyrir nýjar stefnur í öllum helstu málaflokkum sem undir samgöngu- og sveitarstjórnarráðuneytið heyra. Fram kom að í sumar yrði lögð fram til umsagnar, í samráðsgátt ráðuneytanna, drög að svokallaðri grænbók um fjarskipti, netöryggi, póstmál og málefni Þjóðskrár Íslands. Í henni verða drög að stöðumati, framtíðarsýn og helstu áherslum á viðkomandi sviðum.
Á fundinum, sem haldinn var á Hótel Sögu, var farið yfir stöðumat málaflokkanna fjögurra, sjónarmið stofnana og hagsmunaaðila voru kynnt og gestir á vinnustofunni tóku þátt í hópavinnu. Nú verður unnið úr þeim tillögum sem fram komu á fundinum og lögð lokahönd á grænbókina áður en hún fer í opið samráð. Stefnt er að því að ljúka stefnumótunarvinnunni og leggja þingsályktun um nýja stefnu í málaflokkunum fyrir Alþingi á haustþingi 2018.
