„Klukkan 17:00 fara fram mótmæli á Austurvelli og ganga þaðan að bandaríska sendiráðinu. Að þessum mótmælum standa engin samtök, einungis hópur fólks sem blöskrar framkoma Bandaríkjanna gagnvart flóttamönnum við landamæri Mexíkó og Bandaríkjanna. Við erum hópur fólks sem viljum að framkoma gagnvart flóttafólki um heim allan verði bætt, við göngum því fyrir flóttafólk allsstaðar hvort sem það er í Bandaríkjunum, miðausturlöndum eða í Evrópu.“

Þetta kemur fram í tilkynningu frá stórum hópi fólks sem krefst þess að aðskilnaður barna og foreldra sé stöðvaður umsvifalaust og komið sé mannúðlega fram við flóttafólk alls staðar í heiminum. Á fundinum mun Þórunn Ólafsdóttir halda ræðu auk fulltrúa frá samtökum erlendra kvenna á Íslandi, framkvæmdastjóra Amnesty á Íslandi. Þá mun Elísabet Jökulsdóttir, Prodhi Manisha, Dóra Magnúsdóttir og fleiri tala um ólík málefni sem snerta á málefnum barna og flóttamanna.

Í tilkynningunni segir enn fremur:

„Við krefjumst þess að framkoma íslenskra, bandarískra og evrópskra stjórnvalda verði þannig að saklausum börnum og fólki verði ekki komið fyrir bakvið gaddavíra. Þess vegna skorum við á Bandaríkin að skrifa undir barnasáttmála sameinuðu þjóðanna, og þær þjóðir sem skrifað hafa undir eins og Ísland, að virða orð og innihald sáttmálans og vernda börn, ekki vísa þeim frá.“