Fjárfesting í innviðum er meiri á Íslandi samanborið við flest önnur ríki eða um tvöfalt heimsmeðaltal (133% á Íslandi, 70% á heimsvísu). Aðeins Noregur, Japan og Danmörk eru einnig með endurstofnvirði innviða umfram VLF í þessum samanburði.
Þetta kemur í ljós í skýrslu Samtaka iðnaðarins sem gefin var út samhliða Iðnþingi sem ber sömu yfirskrift og þingið: Ísland í fremstu röð – eflum samkeppnishæfnina. Skýrslan sem er hátt í 100 síður er unnin af starfsfólki Samtaka iðnaðarins. Markmið með útgáfu skýrslunnar er að varpa ljósi á stöðuna, sjá hvernig Ísland stendur í samanburði við önnur ríki og hvaða áskoranir þarf helst að glíma við til þess að bæta samkeppnishæfnina. Skýrslunni er ætlað að vera innlegg í upplýsta umræðu um samkeppnishæfni Íslands.
Þegar endurstofnvirðið er borið saman við íbúaþéttleika má sjá sérstöðu Íslands þegar kemur að fjárfestingarstigi og leiða má líkum að því að arðsemi innviðafjárfestinga á Íslandi verði seint há í alþjóðlegum samanburði. Kemur það m.a. til af því að landið er fámennt og strjálbýlt miðað við önnur lönd. Gangur hagkerfisins hvílir því meira á innviðum en víðast hvar og mikilvægi þeirra að sama skapi meira fyrir efnahagslega velferð. Það má sjá t.d. af núverandi uppsveiflu sem hefur að stórum hluta hvílt á samgönguinnviðum. Forgangsröðun fjárfestinga skiptir því höfuðmáli þegar samkeppnishæfni og framleiðni til framtíðar eru metin. Áætlað er að bætt forgangsröðun innviðafjárfestinga á heimsvísu muni leiða til framleiðniaukningar upp á 1 billjón dollara eða 100 þúsund milljarða króna. Til samanburðar var áætluð framleiðsla heimsins um 75 billjónir dollara á árinu 2016.
