Forsætisráðherra, að höfðu samráði við félags- og jafnréttismálaráðherra og heilbrigðisráðherra, hyggst hefja undirbúning að breyttri skipan velferðarráðuneytis. Þetta kemur fram á vef stjórnarráðsins.

Forsætisráðuneytið mun því í samráði við velferðarráðuneytið undirbúa þingsályktunartillögu sem lögð verður fyrir Alþingi sem fyrst á haustþingi 2019, 149. löggjafarþingi. Leitast verður við að halda kostnaði við breytinguna í lágmarki, til dæmis með sameiginlegri stoðþjónustu ráðuneytanna.

Færa má rök fyrir því að skipting ráðuneytisins í tvö ráðuneyti, sem sinni í megindráttum verkefnum í samræmi við núverandi verkaskiptingu ráðherranna tveggja, geti stuðlað að styrkari stjórnun og markvissari forystu sem efli getu ráðuneytanna tveggja til að sinna lögbundnum verkefnum og rækja hlutverk sín á sviði stefnumótunar.