Varðskipið Þór er nú komið til Reykjavíkur með ísfisktogarann Akurey AK-10 sem varð vélarvana djúpt vestur af Vestfjörðum í gærmorgun. Þetta kemur fram í tilkynningu frá landhelgisgæslunni.

Þegar beiðni um aðstoð barst Landhelgisgæslunni, á sjöunda tímanum í gærmorgun, var Þór í tæplega 70 sjómílna fjarlægð en hann var þá staddur á Bíldudal. Um klukkan 13:00 var Þór kominn á vettvang og greiðlega gekk að koma taug á milli skipanna. Að því búnu hélt varðskipið áleiðis til Reykjavíkur með Akurey í togi en siglingin til Reykjavíkur heppnaðist vel og tók tæpan sólarhring.

Þór kom með Akurey AK-10 að Engey á tólfta tímanum í dag en þá tóku dráttarbátar Reykjavíkurhafnar við og drógu skipið að bryggju.