Í nýrri greiningu Samtaka iðnaðarins kemur fram að byggingariðnaður og mannvirkjagerð sé sú grein hagkerfisins sem er að vaxa hraðast um þessar mundir. Í heild fjölgaði launþegum í hagkerfinu um 4% á fyrsta ársþriðjungi en á sama tíma fjölgaði launþegum í byggingariðnaði og mannvirkjagerð um tæplega 14%. Í greiningunni segir jafnframt að byggingariðnaður og mannvirkjagerð beri því uppi fjölgun starfa í hagkerfinu að stórum hluta um þessar mundir.
Þá segir að fjárfesting í hagkerfinu hafi aukist um 11,6% á fyrsta fjórðungi þessa árs frá sama ársfjórðungi í fyrra skv. tölum sem Hagstofa Íslands birti. Vöxtinn má að mestu rekja til íbúðafjárfestinga sem jókst um 38% sem er mikill vöxtur. Á sama tíma jókst fjárfesting atvinnuvega um 7,1% og fjárfesting hins opinbera um einungis 2,2%.
Athygli vekur að 40% stjórnenda sem tóku þátt, telja að aðstæður í atvinnulífinu verði verri en nú, eftir sex mánuði. Aðeins 7% þeirra telja að aðstæður batni. Það er sagt endurspegla viðhorf stjórnenda í hagspám undanfarinna missera, um að það „hægi á hjólum efnahagslífsins.“
Þá telja Samtök atvinnulífsins að hið opinbera eigi að fara á fullt í innviðauppbyggingu og nýta eigi niðursveifluna til að bæta fyrir uppsafnaða þörf á íbúðamarkaði og fjárfestinga sé þörf í vegamálum, umfram það sem nefnt er í fjárlögum.
Greining SI:
• Byggingariðnaður og mannvirkjagerð bera uppi fjölgun starfa í hagkerfinu að stórum hluta um
þessar mundir.
• Að meðaltali voru í hagkerfinu öllu 7.200 fleiri nýir launþegar á vinnumarkaði á fyrsta ársþriðjungi
en á sama ársfjórðungi í fyrra. Tæplega 1.600 þessara nýju starfa voru í byggingariðnaði og
mannvirkjagerð. Merkir þetta að um 22% allra nýrra starfa sem sköpuðust í hagkerfinu á
tímabilinu eru í þessari einu grein. Kemur þetta fram í tölum sem Hagstofa Íslands birti 12. júní sl.
• Í heild fjölgaði launþegum í hagkerfinu um 4% á fyrsta ársþriðjungi. Á sama tíma fjölgaði
launþegum í byggingariðnaði og mannvirkjagerð um tæplega 14%. Er byggingariðnaður og
mannvirkjagerð sú grein hagkerfisins sem er að vaxa hraðast um þessar mundir.
• Fjárfesting í hagkerfinu jókst um 11,6% á fyrsta fjórðungi þessa árs frá sama ársfjórðungi í fyrra
skv. tölum sem Hagstofa Íslands birti fyrr í þessari viku. Vöxtinn má að mestu rekja til
íbúðafjárfestinga sem jókst um 38% sem er mikill vöxtur. Á sama tíma jókst fjárfesting
atvinnuvega um 7,1% og fjárfesting hins opinbera um einungis 2,2%.
• Ljóst er að íbúðafjárfesting er loks að taka kröftuglega við sér eftir mikla ládeyðu. Er það afar
jákvætt að mati Samtaka iðnaðarins. Umtalsverður skortur á íbúðum hefur verið mikið vandamál
undanfarin ár sem meðal annars hefur komið fram í því að íbúðaverð hefur hækkað langt umfram
laun á síðustu árum og þannig hefur það orðið erfiðara fyrir fólk að eignast sína fyrstu íbúð. Aukið
framboð nýrra íbúða skapar betra jafnvægi á þessum markaði sem um þessar mundir er sýnilegt
m.a. í verðþróun íbúða undanfarið.
• Væntingar stjórnenda til aðstæðna í atvinnulífinu eftir sex mánuði, sem birtar voru í vikunni, eru
þannig að 40% stjórnenda telja að aðstæður versni á næstu sex mánuðum. Aðeins 7% telja að
þær batni. Stjórnendur áætla að starfsmönnum fjölgi mun hægar á næstunni en undanfarin ár.
Endurspeglar þetta viðhorf stjórnendanna í þeim hagspám sem birtar hafa verið undanfarið þ.e.
að á næstunni muni hægja á hjólum efnahagslífsins.
• Ofangreindar væntingar, spár og hagtölur undirstrika það sem Samtök iðnaðarins hafa haldið
fram undanfarið að nú sé rétti tíminn til að fara í fjárfestingar í innviðum og ekki síst í íbúðum og
vegasamgöngum. Með því er bæði dregið úr þeirri niðursveiflu sem ellegar væri að skapast í
hagkerfinu og byggt undir hagvöxt komandi ára.
• Samtökin hafa sagt að nú sé rétti tíminn til að fara í innviðafjárfestingar að hálfu hins opinbera og
einnig að niðursveifluna eigi að nýta til að vinna upp þá miklu uppsöfnuðu þörf sem myndast
hefur á íbúðamarkaði undanfarin ár. Mikil þörf er t.d. á fjárfestingum á sviði vegamála um þessar
mundir eftir mikið fjársvelti í þeim málaflokki síðustu ár. Í því efni þarf að gera mun betur en nú er
ráðgert bæði í fjárlögum og fjárhagsáætlun ríkisstjórnarinnar.