„Finnbogason“ hrópuðu þeir til okkar gömlu karlarnir sem drekka saman hér á einu götuhorninu á hverju kvöldi. Þeir þekkja nafn Alfreðs síðan hann spilaði um tíma með Olympíakos, liðinu frá hafnarborginni Piraeus.
Fóru alveg rétt með nafnið þótt það sé langt og ekki alveg auðvelt í framburði. En grísk nöfn eru reyndar oft mjög löng líka.
En svona var okkur fagnað í morgunkaffinu á veitingahúsi Nikosar í morgun. Þar starfar kona sem er mikill listakaffiþjónn. Þessi bolli var borinn á borð fyrir okkur og kom skemmtilega á óvart.
Annars var stórleikurinn í Grikklandi í kvöld úrslitaleikur Panaþinaikos og Olympíakos í körfubolta. Grikkir eru mjög hrifnir af körfubolta og hafa náð langt í þeirri íþrótt. Þessi tvö lið eru erkióvinirnir, Panaþinaikos frá sjálfri Aþenu, kannski svolítið lið fína fólksins, og Olympíakos frá hinni skítugu hafnarborg Piraeus– alþýðlegra lið en gríðarlega sigursælt í fótbolta, vinnur Grikklandsmótið næstum alltaf, spilar í Þróttarbúningi.
En körfuboltaleikinn í Ólympíuhöllinni í kvöld vann Panaþinaikos 84-70