Sigmundur Davíð Gunnlaugsson, formaður Miðflokksins og fyrrum forsætisráðherra, sagði eftir 1-1 „sigur“ Íslands gegn Argentínu á HM í dag, að ef Hannes Halldórsson, markvörður liðsins, sem og liðið allt fengi ekki fálkaorðuna við næstu úthlutun, myndi hann gefa honum sína eigin. Sigmundur hlaut sína fálkaorðu þann 25. desember 2014, sem forsætisráðherra.

Sigmundur hafði lofað Hannesi þessu eftir Evrópukeppnina 2016, en landsliðið hefur þó ekki fengið fálkaorðuna ennþá. Víst er þó að Hannes mun fá sína frá Sigmundi, en hann varði vítaspyrnu frá Messi í leiknum og átti nokkrar frábærar vörslur:

„Stórkostlegur 1-1 sigur! Dreymdi 1-1 en þorði ekki að trúa því. Eftir Evrópukeppnina lofaði ég að láta Hannes hafa fálkaorðuna mína ef hann fengi hana ekki á Bessastöðum. Ef hann og strákarnir fá hana ekki við næstu úthlutun afhendi ég næsta dag. Þetta er algjörlega ótrúlegt afrek!“

Stig Fálka­orðunn­ar eru fimm tals­ins en fyrsta stig orðunn­ar er ridd­ara­kross­inn og flest­ir orðuþegar eru sæmd­ir hon­um. Annað stigið er stór­ridd­ara­kross, síðan stór­ridd­ara­kross með stjörnu og loks stór­kross. Æðsta stig orðunn­ar er keðja ásamt stór­kross­stjörnu en hana bera ein­ung­is þjóðhöfðingj­ar.