Þrír kjósendur sem eru á kjörskrá í Árneshreppi nýttu ekki kosningarétt sinn í dag. 46 eru á kjörskrá og þegar kjörstöðum lokaði voru 43 búnir að kjósa. 7 atkvæðanna voru utankjörfundaratkvæði.
Árneshreppur var í sviðsljósinu fyrr í vor þegar í ljós kom að 18 manns hefðu flutt lögheimili sitt þangað á tveggja vikna tímabili. Töldu margir að þar væru á ferðinni svindl fyrir kosningar tengt Hvalárvirkjun. Þjóðskrá ógilti sextán af þeim átján sem fluttu lögheimili sitt þangað.
Kosning í Árneshreppi er ekki bundin við lista heldur eru allir í sveitarfélaginu í framboði. Fimm sæti eru í boði. Guðlaugur I. Benediktsson og Hrefna Þorvaldsdóttir, sem sátu í minnihluta á kjörtímabilinu sem er að ljúka, báðu um að verða ekki kosin.