Það er bryddað upp á ýmsu í aðdraganda kosninga hjá framboðunum til að koma boðskap sínum á framfæri. Frelsisflokkurinn, sem hefur mælst undir Malt-prósentu, tók upp á því í gær að mæta fyrir utan heimili Katrínar Jakobsdóttur, forsætisráðherra til að spila ættjarðarlög á hæsta styrk.

Tumi Úlfarsson, sem er nágranni Katrínar, náði meðfylgjandi mynd af bifreið Frelsisflokksins. Hann segir í færslu sinni á Facebook að hávaðinn hafi verið slíkur að kona hans hafi þurft að flýja í annað herbergi með nýfæddan son þeirra.

Í athugasemdarkerfinu kemur fram að bifreið framboðsins hafi einnig keyrt upp göngugötuhlutann af Laugavegi „blastandi Gylfa Ægis.“

Ekki er ljóst hvað lá fyrir Frelsisflokknum með athæfi sínu utan við heimili forsætisráðherra, hvort um mótmæli eða svokallaðar atkvæðaveiðar var að ræða.

Þess má geta að forsætisráðherra, líkt og allir ráðherrar ríkisstjórnarinnar, auk forseta Alþingis, eru með neyðarhnapp á heimili sínu, telji þeim sér ógnað. Sé ýtt á hann, kemur sérsveitin askvaðandi með alvæpni á svipstundu til varnar.

Ekki er vitað til þess að neyðarhnappurinn hafi verið notaður í þessu tilfelli.