Eyjan greindi frá því í fyrradag að Páley Borgþórsdóttir, lögreglustjórinn í Vestmannaeyjum, hefði blandað sér með beinum hætti í kosningabaráttuna er hún ritaði mikla varnargrein fyrir Elliða Vignisson, bæjarstjóra og bæjarstjóraefni Sjálfstæðisflokksins. Páley, sem er sjálf fyrrum bæjarfulltrúi Sjálfstæðisflokksins, skrifar í grein sinni að henni hafi fundist umræðan um Elliða ósanngjörn og ekki sönn. Greinin lofar Elliða og vinnubrögð hans í hástert og spyr Páley hvort Eyjamenn séu virkilega tilbúnir að missa einn „mesta baráttumann Eyjanna frá stjórnun bæjarins.“

Í athugasemdarkerfi Eyjafrétta er spurt hvort það sé við hæfi að lögreglustjórinn blandi sér í kosningabaráttuna.

Samkvæmt heimildum Eyjunnar hefur Páley einnig sinnt úthringingum fyrir Sjálfstæðisflokkinn í Vestmannaeyjum, þar sem lögreglustjórinn er sagður hvetja til þess að fólk kjósi Sjálfstæðisflokkinn.

Í Evrópskum leiðbeiningarreglum um siði og breytni opinberra ákærenda frá 2005, gjarnan nefndar „Búdapestreglurnar“ þar sem ráðstefna Evrópskra ríkissaksóknara fór fram, skipulögð af Evrópuráðinu, er þátttaka ákærenda (lögreglu)  í stjórnmálum skilgreind sérstaklega:

„Þá þurfa ákærendur að gæta þess sérstaklega, taki þeir þátt í opinberri umræðu, starfi stjórnmála eða öðru slíku, að þátttaka þeirra og framganga sé með þeim hætti að hlutleysi þeirra sem ákærenda verði ekki dregið í efa.“

Í siðareglum lögreglunnar á Íslandi sem tóku gildi 1. febrúar 2016, segir í 13. grein:

„Starfsmönnum lögreglu ber að forðast verkefni utan lögreglu sem geta leitt til hagsmunaárekstra og skulu önnur störf en lögreglustarfið víkja fyrir því.“

Samkvæmt heimildum Eyjunnar hefur Páley tekið þátt í úthringingum á vegum Sjálfstæðisflokksins í Vestmannaeyjum. Slíkt gæti brotið í bága við 13. greinina.

Í 15. grein segir ennfremur:

„Starfsmenn lögreglu skulu gæta þess að aðhafast ekkert það að í starfi sínu eða utan þess, sem er til þess fallið að draga óhlutdrægni þeirra í efa við framkvæmd starfa sinna.

Starfsmenn lögreglu skulu gæta orða sinna í hvívetna til dæmis við skoðanaskipti á veraldarvefnum, s.s. uppfærslur á samfélagsmiðlum og athugasemdir undir fréttir á fréttamiðlum.

 

Samvæmt þessu gætu andstæðingar Sjálfstæðisflokksins vísað bæði í 13., og 15. greinina til merkis um að Páley hefði brotið í bága við siðareglur lögreglu.