Ingvar Mar Jónsson, oddviti Framsóknarflokksins í Reykjavík, sat fyrir svörum í Beinni línu á DV í dag. Meðal þess sem spurt var um var hvort hann vildi sameina sveitarfélögin á höfuðborgarsvæðinu. Sagði Ingvar það skynsamlega leið:
„Mér finnst mjög skynsamlegt að gera það og ég er algerlega tilbúinn til viðræðna í því tilliti. Slík sameining á vel við skipulagsmálin, því þá er hægt að skipuleggja svæðið sem eina heild,“
sagði Ingvar og deildi framtíðarsýn sinni í skipulagsmálum:
„Besta byggingarlandið er á Álftanesi og framtíðarmúsíkin er sú að koma Skerjabraut út í Álftanes. Þar verði blómleg byggð nálægt miðbænum og þegar brúin er komin ertu kominn þangað á 5 mínútum. Til lengri tíma litið heldur þetta svo áfram í áttina að Keflavík, og styttir leiðina þar á milli. Það þarf að koma á hringakstri utan um borgina, í stað þess að fara með alla umferð í gegnum Hafnarfjörð og Garðabæ,“
sagði Ingvar.
Hann tók einnig fram að Framsókn gæti unnið með öllum flokkum:
„Ég verð að segja að ég held að ég geti unnið með öllum flokkum, en það er fyrst og fremst í höndum kjósenda að stilla þessu upp. En við verðum að lesa í tölurnar til að sjá hvað það er sem kjósendur vilja.“